ASAL KITAI IBAN NEMU ADAT BERUMAH KELIA

Lebuh rambau kitai bansa Iban ke betuai ka Bejie Nangga Ari Patah Titi Jamban Penjuang kelia menya, kitai Iban endang sigi nadai pendiau enggau pengarap ke tetap ti di pegai. Sida Bejie tu agi diau dalam babas serta dalam lubang gua ti bisi ngelingi menoa nya. Batang pengidup enggau pendiau sida iya besari sari bepanggai bendar ba pengawa begiga ka pemakai sebelah babas, dalam kampong puang enggau sebelah sungai ti semak enggau menoa ke endor sida iya diau. Sida Bejie tu nadai ngereja pengawa betanam betupi lalu nadai pendiau ti entap baka pengidup ti dikemeran ka kitai kemaya ari diatu.
Nyadi bansa bukai ke diau ari ili menoa sida Bejie tu, endang lebih mansang agi ari bansa kitai. Kabuah pia, laban sida iya bisi agi pelajar enggau penemu kena nusun pendiau diri. Nyadi penemu tu dibai bansa bukai ke bisi betampil enggau pendiau sida iya, baka bansa Arab, Minangkabau, Sumatra enggau bansa Jawa. Pendiau sida tu entap agi laban sida iya ngemeran ka pengawa betanam betupi sereta enggau pengawa bedagang, belayar sebelah pulau Borneo, Jawa, Sumatra enggau tanah besai Malaya. Sida mega balat bendar ngarembai ka pengarap sida sabelah rantau tu,kelebih agi orang ke megai pengarap Islam rambaunya kelia. Kebuah sida iya baka nya, laban sida deka ngerembai ka kuasa perintah sida ngagai bansa orang bukai, nyengkaum bansa Dayak ke diau dalam pulau Borneo tu. Ari nya tadi sida tau bekuasa megai menoa enggau pengeraja menoa tu. Lalu pengawa baka tu endang dipupuk sida ari serak siti ngagai serak siti, nyentuk ka kemaya ari diatu. Pengarap bukai, baka pengarap Hindu enggau pengarap Buddha ke dulu datai di menoa kitai tu kelia pan barengkah bapechah ngagai sabelah tisau menoa nyengkaum pulau Borneo enggau pulau Bali. Bala sida ke peturun raja enggai masok ngagai pengarap baru nya lalu pindah ngagai menoa bukai, baka sida Raja Durong enggau Orang Panggau-Gelong. Sida lalu mai pengarap enggau penemu sida ngagai bansa kitai Iban. Nya kabuah dalam pengawa gawai, leka jako, atur pendiau enggau pangkat kitai Iban (e.g. Pateh, Temenggong, Penghulu, etc) bisi sebaka enggau orang ke megai pengarap Hindu tauka sebaka enggau leka jako serta pangkat ti dikena bansa Minangkabau. Pengawa gawai ke endang sebaka enggau sida tu iya nya pengawa miring enggau pengawa niri ka tiang chandi tauka kalingkang leboh kitai ngerja pengawa gawai burong.
Leboh tuai kitai Bejie enggau tuai-tuai bukai baum deka ngaga tangga dikena niki ka langit dikena batemu enggau petara ke nguasa pengarap Islam, dia Bejie ngasoh menyadi iya benama Bada nyadi ka tuai nyaga serta ngiring bansa kitai Iban. Bada lalu nyadi ka tuai ngulu ka bala iya ngemeran ka pengawa ngasu, berikan enggau begiga ka utai bukai dikena ngidup ka bansa diri. Maia nya menya, kitai Iban diau enggau lantang senang lalu nadai bemunsoh enggau bansa bukai, laban tuboh endang enda tentu mayuh lalu menoa pan agi puang serta lantang alai ngidup ka diri.
Nyadi sakali ko jerita, leboh Bada enggau anembiak iya pulai ngasu, ari balat bendar ujan. Meda ujan ngemalat nya, sida iya sebuat lalu mampat daun kayu, dikena ngelindong diri ari tinggang ujan serantau jalai. Datai sida iya ba lubang batu ka alai sida iya diau, dia menyadi sida ke indu tak tekenyit meda sida ke pulai ngelaban ujan nya tadi enda basah. Bada lalu madah ka sida iya belindong baroh daun kayu, nya kabuah sida iya enda basah laban ujan.
Bechuan ka nya tadi, kitai Iban lalu nemu mampat daun dikena belindong ka ujan tau ka panas ke lalu dikumbai sida dunju. Udah ngasai ka penyamai ngendoh ka ujan enggau panas baroh dunju, nya baru sida nemu ngaga langkau ke tau alai diau, beatap ka daun kering. Barengkah ari nya, kitai Iban lalu nemu begiga sereta enggau mindah jauh agi ari lubang batu ke alai kitai diau, lalu ngujong ka kitai lalu badu agi diau dalam lubang batu.
Sepengudah meh sida iya ngasai ka penyamai diau ba langkau nengali kediri, runding sida iya pan mansang agi ari ke udah. Sida iya pan nyau nemu begaga ka dampa ke endor sida tau diau begulai mayuh enggau pangan diri, lebih agi sida ke enggai jauh ari diri Sabilik bekunsi makai, bekunsi jalai ngidup ka diri.
Laban dampa nya mit, lalu tuboh sida iya pan nyau mansang mayuh, sida ke diau bedampa dia pan nyau berasai sekut. Ari nya tadi sida lalu nemu ngaga penaik enggau buka dampa nya besai agi, ke dikumbai sida iya rumah.
Leboh sida baru berumah, udah sida tembu ngentak ka tiang rumah, pagi hari siti leboh sida deka nampong pengawa sida iya baru, dia sida meda semua tiang ke udah didirika ka sida dulu ari nya,nyau rebah magang. Meda utai bakanya, sida alit bendar ati, nya alai sida lalu ngentak ka tiang nya baru. Pagi siti, leboh sida napat ka pengawa sida dia baru, peda sida tak udah rebah magang ga tiang rumah nya tadi. Tiga hari sida beturut ngentak ka tiang nya, tang tiang sida rebah berari-ari.
Ari siti sida lalu ngentak ka tiang nya dalam agi. Pagi siti leboh sida ngabas tiang sida dia, peda sida tak tengelam magang tiang sida nya tadi. Semina mimit aja agi dipeda bekachuit pansut ari tanah. Leboh sida Bada agi berunding ka utai ti nyelai bakanya, alai anak temuai siko bisi datai ari kampong lalu bejalai nuju sida dia. Iya lalu nanya ka pengawa sida ke begempuru dia. Bada lala madah ka diri deka berumah, tang lalu enda nyadi.
“Enti enda rebah, tengelam ga tiang dientak ka kami,” ko saut Bada.
“Kati alai utai tau bakanya, iya kati ka adat dikena kita berumah deh punggal?” ko tanya anak temuai.
Bada lalu madah ka diri nadai adat dikena barumah, laban endang enda kala ngereja pengawa nya ke ngelamatu.
“nya kebuah pengawa kita enda nyadi, laban kita nadai atur, nadai adat dikena ngereja utai,”pia ko anak temuai nya tadi.
Ninga jako anak temuai munyi nya, Bada lalu minta ajar anak temuai bakani ko adat kena berumah, awak ka tau ka chuan ka teladan sida kedudi ari ila. Anak temuai nya pan lalu bejako madah ka tanah alai sida iya nya bisi orang ngempu iya. Enti mensia bisi pengawa ba tanah nya, sida enda tau enda meri tasih ngagai petara ke beempu ke tanah nya, iya nya Raja Semarugah, mentua Raja Sempulang Gana. Bada lalu nanya ka jalai meri tasih tanah nya, laban Raja Semarugah enda nyengala, enda nyerupa dipeda enggau mata. Ninga tanya Bada munyi nya, anak temuai nya tadi lalu ngajar sereta ngelalau Bada munyi tu:
Kejang kita deka berumah, tiap-tiap iko tuai bilik enda tau enda dulu ngerembang.
Tuai ke diator dulu ngentak enda tau enda ngiga tambak burong nendak kanan lima iti enggau tambak nendak kiba tiga iti. Iya ke lima iti nya untong orang ke lelaki lalu iya ke tiga iti nya untong sida ke indu. Paung burong tu enda tau enda dianjong ngagai tanah ke deka alai ngerembang, lalu diengkah ka ba senentang bilik orang ke dulu ngentak.
Kejang deka ngentak,sida ka indu enda tau enda dulu ngaga perengka piring.
Kejang deka ngelubang ka tiang pemun, babi tauka manok enda tau enda dibunoh. Darah iya dikena ngenselan tiang enggau lubang nya.
Batu kuai enggau repik besi enda tau enda dibai ka dalam lubang tiang pemun.
Udah tiang dientak, pating mumban lalu di ujak ka ba pun tiang nya.
Udah anak temuai bejurai ka adat, nya baru iya madah ka piring enggau darah babi tauka manok nya tadi nyadi ka tasih tanah diberi ngagai Raja Semarugah ngena leka sampi.
Nyadi repik besi, batu kuai enggau pating mumban nya, laban sida nya enda rarat taban ka ai baah, ngayu ka penegut enggau pengukoh rumah nya.
Enti ngentak ka tiang, enda tau enda dulu berengkah ba endor ke alai ngengkah tambak burong nya tadi. Nyadi tambak burong nya tadi disimpan dalam buloh lalu diengkah ka dalam dunju mit, udah nya dibagi segenap pintu ngagai bala urang ke ngentak dia.
Lalu pia mega orang ke dulu ngentak nya enda tau enda nitih ka ari ni pun ramu. Udah tembu orang ke pun ramu nya ngentak, nya baru orang ke ari ujong ramu sapiak tau ngentak ka tiang sida iya.
Udah tembu jako anak temuai nya ngajar bala sida Bada adat dikena berumah, iya madah ka diri deka pulai. Iya lalu madah ka penama diri Puntang Raga, ke datai ngajar sida ari asoh Raja Semarugah. Udah nya iya lalu lesap nadai temu penunga agi.
Lalu beduruk ari ajar Puntang Raga ke diasuh Raja Semarugah ngajar sida Bada nya kelia,nya meh pengemun iya kitai Iban nemu adat berumahpanjai, lalu nyentuk ka saritu mega, adat ti bakanya mengkang agi dikemeran ke kitai bansa.


BESI

PUN PENEMU BERINTU KA INDU BERANAK ENGGAU PEMALI TAJU REMAUNG

NIANG EX TR BANYAN AK BESI BENUNG BIBAT LENGAN ENGGAU MENYADI IYA PEMANCHA JANTAN.(gambar tu diambi enda kurang ari 20 taun ti udah,lebuh maya ngintu ari gawai dayak ba RH KAYAN NANGA MANGUT, MACHAN, KANOWIT)


Kitai bansa Iban tu endang sigi balat amat dipuji mayuh bengkah bansa bukai dalam dunya tu,nyadi kitai bansa Iban balat dipuji, kelebih agi baka bala sida bansa ribai.Kebuah piak, laban kitai bansa Iban tu bempu ke chukup mayuh macam jerita, ensera sereta macam macam bengkah main asal enggau adat ti chukup nyelai, tang manah sereta agi mengkang dikemeran ke kitai bansa nyentukka saritu. Baik ke nya pengawa ke bisi besangkut dalam penemu beridup kediri, penemu bumai betaun, penemu begiga ke jelu enggau ikan sereta mega lauk ke bukai ari ai, ari babas lalu enggau mayuh macham bansa pemakai ke bukai.Pengelandik nya endang sigi bisi dikembuan ke bansa kitai kenyau ari serak tubuh sida aki ini kitai dulu menya nyentuk ke saritu.Pengelandik kitai Iban besenentang enggau pengawa ke bakatu,sekeda nya ulih disidi ka kitai ari dalam bup,lalu sekeda nya semina ari tusui pangan diri sereta ajar ari bala urang ka tuai.
Beduduk ari diri ke balat sayau ke pengawa asal kitai bansa. Lalu ke tambah nya mega,laban ka ngira bala kami ke rebak dudi tu udah jauh amat tinggal sereta nemu penatai asal diri,pengawa enggau adat main asal kitai bansa Iban. Nya alai aku deka ngunsi ke enggau bala siti jerita lama kitai bansa,iya ke disalin aku baru ari bup Pong Kapong ke ditulis Kadir Umbat. Jerita tu manah bendar ,lalu di pelaba ka aku iya tau bendar mulai ka pengingat kitai nembiak ke rebak baru diatu.
Nyadi cherita ke deka dikunsi ke aku ditu,siti jerita besenentang enggau pengawa kitai Iban ke beranak dulu menya. Nyadi cherita ke bakatu tu mayuh bengkah kala didinga ka kitai,seneka kitai empu aja milih ari ni kuing enggau tunga jalai cherita iya.
Nyadi kelia menya, rambau maya menoa ke agi semak enggau sida petara,semak antu semak jelu, rambau kitai anak mensia bedau tentu jauh ngejang ari utai bukai dalam dunya tu, agi begulai sejalai enggau semua utai idup. Nitih ke jerita tuai,sida ke indu lebuh datai maya deka beranak,sida deka dibuntas pia aja. Bedau kala bisi siko pan sida ke ulih idup lebuh ke beranak maya nya kelia,anak sida iya idup tang indai iya mati. Beduduk ari sida ke nadai chara bukai ngulihka anak nya, enti enda ngena jalai muntas perut indai iya. Nya kebuah rambau maya nya kelia nadai siko pan entara sida ke ulih beranak lebih ari sekali.
Lalu rambau maya nya menya,bisi siko lelaki ke penama iya Ungit. Ungit tu bedau tentu pengelama iga udah niri ke ruang bilik begulai enggau bini iya. Nyau pengelama seduai ke udah begulai enggau pangan diri,dia deh tudah bini Ungit tu tadi lalu ditemu udah bisi tubuh. Meda bakanya,tudah aki kitai Ungit tu menya balat amat tusah ati. Laban ke ngenang diri deka ditinggal ke bini ti di kesayau ke tudah tuai iya mati lebuh ngada ka anak seduai iya ila.
Ati tudah Ungit tu tadi balat amat tusah lebuh ke ngenang ka bini iya deka mati,dia deh tudah Ungit tu keno ko jerita tak selalu nyeliah sereta ngenyauh kediri ari ke begulai enggau urang bukai agi. Semua pengawa begiga ke lauk babas enggau turun ke tanah dikereja Ungit kediri magang. Ko cherita,nyau kepemuas tudah Ungit tu ke selalu pereman mai diri ba sebelah tanah enggau babas,dia deh ari siti lebuh tudah ke turun ka babas kediri diri, dia iya bisi ninga utai nyau chapuh ba puchuk kayu din. Tudah Ungit tu tadi lalu ngansak mansang semak-sesemakka agi,iya lalu belalai ba pun kayu ke enda tentu jauh ari utai ke chapuh nya tadi. Laban ke deka nemu nama utai ke ngasuh sida nya nyau chapuh.
Dia deh Ungit tu tekenyit amat,enda mukai mukai dipeda iya bala mayas benung ngeringak bebelaka siku indu gali ba atas rajang. Dipeda iya mayas nya tak betekan ka perut indu nya,lalu enda lama udah nya Ungit lalu tekenyit,dia iya meda anak indunya lalu ada.
“Nya lia tenchang ba dan kayu,” ko jaku sida didinga iya. Udah nya peda iya lia nya tadi lalu diunsut-unsutka sida ba sebelah tubuh indu ke beranaknya. Enda lama udah bekau indu nya diunsut enggau bala lia nya tadi, dia iya meda indu nya lalu tau duduk.
“Nya gaya mayas ngintu indu beranak, ni enda idup indai iya,” pia ku Ungit bejako kediri.
Seninjik bendar ga baka ke disumpah antu,dia iya bisi tepeda ka lia mayas nya labuh ari puchuk kayu ke alai sida ke ngintu indu nya. Tudah Ungit lalu ngansak semak ke agi begadai gadai nangi ke didinga ke bala mayas nya tadi. Lebuh maya mayas nya enda tepeda ke iya, Ungit lalu beguai guai beambika bala papung lia nya tadi. Papung lia nya tadi lalu dibai iya pulai ngagai bini iya. Datai dirumah seduai iya,Ungit lalu nusui utai ke bisi dipeda iya ngagai bini iya. Dia iya lalu madah ka ngagai bini iya bakani ke gaya sereta jalai mayas ngintu indu beranak baka ke udah dipeda iya lebuh ti bejalai begiga ke lauk dalam babas tadi.
Udah nya Ungit lalu mai bini iya pindah,seduai iya lalu diau kediri jauh mimit ari pendiau urang bukai. Papung lia ke dibai Ungit nya tadi lalu ditanam ka seduai iya melaki bini. Lia nya pan lalu nyadi senyadi sereta nyau makin betambah mayuh.
Kira ke nyau datai ba bulan bini Ungit ka beranak,Ungit lalu naban ke bini iya ngagai lubang batu. Laban Ungit nangi ke bini iya kena laban ribut enggau ujan enggai ke tubuh bini iya enda nakal,lalu tau ngujung ke nyawa bini iya lesi bebadi. Enda lama udah nya bini Ungit pan beranak,iya lalu bebela ke bini iya nunda gamal bela bala mayas ke udah dipeda iya dulu suba. Naka meh pengiruh tudah Ungit tu bebela berintu ke bini iya beranak. Beduduk ari pengangkun sereta penyayau Ungit ka bini iya,dia iya lalu mujur ngintu bini enggau anak iya. Bini Ungit nadai apa,anak seduai iya pan gerai. Ko cherita,bini Ungit tu lantang bendar ati iya,meda diri ke agi idup udah bekau ke ngada ke anak seduai iya keterubahnya. Lalu bini Ungit nya meh indu keterubah ba menoa nya ke idup udah bekau ke beranak.
Dia iya lalu minta di penyadika Ungit api, laban deka di kena iya bekindu ngangatka tubuh, laban enti tubuh angat,deka berasai nyamai agi,enda nyilu. Lalu nya meh keterubah asal bala indu nemu bekindu udah sida iya beranak. Tang kemaya ari diatu,pengawa bekindu tu nyau jarang dikereja sida ke indu,semina bala ke diau di rumah panjai aja ke agi balat amat ngemeran ke bekindu enti udah badu beranak.
Nyau pulai ngagai bala sida Ungit serumah,nyadi bala sida iya serumah nyau balat amat irau ati. Laban Ungit seduai bini iya lama amat udah nadai dipeda sida iya. Sida lalu belabuh begiga ngagai langkau seduai iya,datai dia nadai ga seduai iya dia. Meda aki kitai Ungit seduai bini tu menya nadai dia,bala sida Ungit serumah pan lalu begiga ngagai sebelah lubang batu. Datai sida dia,sida iya lalu belabuh bekangau ka nama dua iko melaki bini nya,tang nadai ga ninga nyawa seduai iya nyaut. Nyau kepemuas iya,sida iya ke dia. Dia deh sida bisi meda asap pansut ari lubang batu. Sida iya ke begiga ka Ungit enggau bini iya nya tadi pan lalu bisi ensium utai tak bau rengut. Kati enda bau rengut disium sida,nya ga lia ke dikena bini Ungit ke baru udah beranak.
Meda baka nya,sida iya sebuat pan lalu tama ngagai lubang batu,datai sida iya din,sida iya lalu tekenyit meda bini Ungit benung bekindu ngimbai siku anak mit ti baru ada. Ungit tu tadi lalu dipeda sida iya tuchum ketawa nyenguk gamal anak lelaki iya ke baru adanya. Udah bekau sida iya serumah meda pemujur bini Ungit tu beranak,sida iya lalu betanya ka ngagai Ungit bakani ke jalai tudah tuai berintu ke bini iya beranak lalu tau enda mati dibuntas. Ungit pan lalu nusui meh ari pun nyentuk ke ujung bakani ko gaya iya meda bala mayas berintu ke indu beranak munyi ko ari pun jerita tu tadi. Iya lalu madah ke bala sida iya nya tadi tau ngambi tambak lia nya ari semak langkau seduai iya. Ngambi ka bisi engau sama betanam ke lia.
Berengkah ari nya kelia,bala kitai mensia pan lalu berengkah betanam ka lia,sida iya serumah balat amat pengangkun ka Ungit laban ke udah bulih penemu di kena ngintu indu beranak sereta lalu deka bebagi ka lia ngagai bala sida iya. Sepengudah serak tubuh sida Ungit nya kelia meh pun kitai mensia nemu ngintu bini beranak.
Nyadi siti utai ke nyelai amat ,tudah anak Ungit tu tadi tak bebulu,lalu lebuh iya makin mansang besai,bulu iya pan nyau majak bauh sebauh. Lebuh anak Ungit tu nyau besai bendar,dia deh bulu tudah tuai nyau belikau likau. Meda utai baka nya nyadi ba anak seduai iya.
Dia Ungit seduai bini iya pan lalu bejako enggau anak seduai, “Oh, kati alai nuan tu tak bangat nyelai amat ari orang bukai deh anak, tak bebulu. Tubuh nuan anak baka mensia, tang nuan tu tak bebulu baka jelu. Enda meh kami duai indai nuan nemu begulai enggau nuan tu anak,” pia ku Ungit tu tadi bejako enggau anak iya. Ninga jako apai iya nyau munyi nya,dia deh anak Ungit tu tadi lalu nyaut jako apai iya.“Endang sigi amat jaku seduai nya apai, lalu enti seduai enggai begulai enggau aku, kati ko aku enggau iya deh apai, indai,” pia ko saut iya.
Udah bekau nya, anak seduai iya nya tadi pan lalu mupuk ninggal ka seduai melaki bini iya kediri. Apin tentu jauh iga pengudah iya ngejangka endur nya, iya pan lalu bebali nyadi remaung. Datai iya ba semak tuchung Bukit,dia iya lalu negung inggar bendar.
Nyau munyi ko dalam leka sebut bala sida Lemambang timang jalung, lebuh ke nyebut datai ba menua remaung: …Nya ga menua aji ke berani tau tenung raja suka remaung, iya ke landik negung, lubang ooh mua,…ooh mua lubang.

Ninga utai nyelai amat munyi nya,Ungit seduai bini iya bisi bendar pengirau ati ngagai anak seduai iya. Ungit lalu bejako kediri.“Nama utai empu nyawa nya, antu jelu kini?” pia ko Ungit. “Enti baka menua ke bisi remaung, tentu nya utai ke empu nyawa. Manah aku nyidi bekau anak tua tadi,” pia ko Ungit.

Iya lalu nyidi bekau kaki anak iya tadi, tang semina tetemu ka bekau kaki jelu aja ke bisi dipeda.

“Tentu udah mati meh tudah anak aku tu, empa jelu ke bemunyi nya tadi,” pia ku puchau tudah Ungit. Iya pan lalu mulai ke diri ke rumah seduai iya, datai din iya lalu madahka ngagai bini iya bekau anak seduai ti nadai temu penunga, mina ke bisi ditemu bekau kaki jelu aja.

Enda bangat lama udah nya, kira dua ari udah bekau anak seduai iya ninggal ke seduai melaki bini, dia seduai bisi ninga nyawa utai negung semak endur seduai ke diau dia. Ungit pan lalu pansut ari lubang batu, lalu besampi meh tudah tuai iya.
“Aku nadai kala ninga utai munyi tu. Enti nuan nya antu tauka jelu, anang munuh anak telesak aku. Enti nuan udah munuh anjung pulai kitu bangkai iya.”
Enda lama udah bekau Ungit tu ke besampi,dia tak semerap munyi utai didinga iya dalam babas ke semak alai iya ke bediri nya tadi ,lalu tak di peda Ungit tak anak iya empu ngayan kediri dia. Dia anak iya lalu bejako, “Anang agi bejako nuan apai, aku meh ke bemunyi didinga nuan nya tadi. Aku tu nyadi remaung. Seduai indai diau manah-manah enggai ka aku saru, ko iya meri jako tangkan ngagai apai iya.
Iya lalu nampung jako, “Enti kita meda bekau aku makai, anang negu bekau nya. Enti kita meda tai aku, bap enggau daun idup. Enti kita meda tubuh aku empu, anang tak terus lalu belanda, terus rari. Surut dulu,udah nya baru belanda.
Tudah Ungit seduai bini iya tu tadi nyau nyinuk bendar ninga ajar anak seduai iya. Anak iya nya pan lalu nampung jako iya baru, “Nyadi tu pantang enti lebuh maya kita berapi, anang mutarka papung unggat. Anang nunu lemetak tauka gamat. Enti kita diau ba langkau, anang ngelempaika utai ba mua pintu.
“Anang sesekali nyakap kami enggau jako. Enti kita meda buah tau tak bisi, nadai batang nadai pun, anang makai buah nya. Nya taju ditaanka kami. Enti kita makai buah nya, kita deka mati ulih kami,” pia ko jako anak nya tadi ngajar apai seduai indai iya. Udah nya iya lalu lesap, nadai temu penunga agi.
Agi dulu kelia,endang amat mayuh remaung diau ba pulau Borneo tu, tang diatu nyangka nyau udah punas kini.
Kebuah orang nemu bisi remaung laban orang mayuh tetemu ke kerubung kerang kerubung lukan ba sebelah mua lubang ba atas tuchung Bukit ke tinggi tinggi.
Kemaya ari tu, enti kitai bisi rembus ngagai kampung jerung tuai nadai didingaka kesung nyumbuh bujang, kampung sunyi nadai dinga kesuie munyi orang orang, lalu enti kitai bisi ngereja utai salah pantang, tau kitai bisi ninga nyawa remaung. Tang nya ukai iya ti bendar, nya nyawa antu mali diri nyadi remaung.
Nya alai bepun ari cherita Ungit seduai bini enggau anak iya ti bebali nyadi remaung,nya ngemun ka bala kitai bansa rambau nya lalu belabuh nemu ngintu diri beranak. Ka tambah nya sida mega nemu bebasa ka antu ka jelu lebuh maya ke bejalai dalam babas enggau kampong puang,kelebih agi ketegalka takut kena laban taju remaung. Nya meh kebuah adat lama enda tau ditinggal tauka dilengka ke kitai taja pan kitai kemaya ari tu mayuh udah masuk ngagai pengarap ke baru. Laban adat enggau pengarap lama kitai bansa endang sigi agi bisa sereta tau nganu enti dilaban kitai. Kitai tu tuchi darah Iban,enda ulih dikeenggai ke kitai,antu agi semak enggau pengidup kitai besari sari.



BESI

Batang adat Iban kenyau ari kelia menya

NIANG EX TR BANYAN ANAK BESI

Tusun Tunggu endang dititih nyadi lalau sereta ‘tungkat’ kitai bansa ba rumah panjai kenyau ari sida ke tuai dulu menya nyentukka saritu

Rumah panjai kitai Iban tau dikumbai nyadi ka batang pendiau kena ngempung kitai Iban ari kelia nyentukka diatu. Iya mega nyadi ka pengempung semua batang pengawa kitai raban bansa Iban.

Kelimpah ari nya, rumah panjai mega nyadi ke pun enggau panggau penempa adat asal kitai Iban dalam pengawa bumai betupi sereta mega semua pampang pengarap asal Iban dikena bumai, pengidup ngemerankan ruang bilik, enggau pengawa ke bukai ba rumah panjai, adat enggau atur pasal pengerai enggau semua utai bukai mega.

“Nyadi ketegal tu tetiap iku orang ke bisi nguan siti rumah panjai nya mesti deka kena serangkung atur penyerakup, nadai ngira tuai tauka biak. Kaul diri menyanak, diri sebilik endang siti ari utai ke beguna bendar.Kebuah pia laban tiap iku mensia ba rumah nya enda tau enda bebasa ka pangan diri
“Pia mega baka bala sida ke anembiak ending sigi dilalau awak ka bebasa ka orang ke tuai agi, lebih agi apai indai, aki ini diri empu. Nya meh kebuah semua urang ke serumah menya endang mayuh agi ending sigi bala diri sebilik. Sida kiruh amat ka pengidup pangan, senang tauka tusah. Enti senang, semua senang.

“Enti bisi penusah, semua bela sama besaup ngelempungka iya. Enti bisi bulih ngasu, bulih jelu, sigi d’emparu ka sama enggau diri serumah, lalu pia mega enti bulih ikan bulih undang enggau pemakai bukai endang selalu bebagi enggau diri serumah, nadai kala d’empa nengali,”

Ka tambah nya mega, enti bisi buah baka engkeranji, sibau, kembayau, rian, pakan enggau buah bukai, bala orang ke bempu pun buah nya menya seruran sama bebai ke bala sida iya serumah bukai sama niki, lalu bebagi enggau sama bela.

Ba pengidup rumah panjai dulu menya, lalu agi mega dikena sekeda orang rumah panjai nyentuk ka diatu, semua atur gawa, turun enggau bumai, endang sama bela besaup ngambika jampat tembu tauka teputar.

Orang menya gagit bendar deka beduruk enggau pangan diri laban rindu gawa bebala mayuh, sereta mega siti ari chara ke dikena sida iya negutka agi tanggam tali kaul enggau diri serumah.

Nya meh kebuah bala ke diau ba rumah panjai balat amat ngemeranka pemanah kaul sereta basa enggau pangan diri. Ari tu sida udah selalu diberi petara ke nyaga sida iya pengelikun sereta mega pengelantang begulai enggau pangan diri.

Nya alai nyentukka saritu rumah panjai semampai nyadi ke palan ti pemadu dikesayau ka semua kitai Iban,kelebih agi baka sida iya ke ending sigi agi angkun ka pendiau begulu baka ba rumah panjai ke mai mayuh penguntung ngagai semua.

Kitai mega sama ngasai, enti lebuh maya bisi pengerami, kelebih agi baka Gawai Dayak ke d’intu genap taun, bala kitai Iban ari nengeri sigi gagit amat deka begawai ba rumah panjai, laban diak meh alai ke andal sereta angkun ati lebuh maya berami ngintu ari gawai. Mayuh agi pengerami Gawai kitai ba nengeri nadai banding enggau Gawai ba rumah panjai, laban intu rumah panjai numbas ngemeranka pangkat, renggat umur enggau pemisi, tang dikira sebaka magang. Tuai biak enda ngira indu tauka lelaki semua sama bebuti enggau pangan diri.

Semua anembiak redak siti siti rumah panjai ending sigi nemu sida mesti bebasa sereta sama besukung ka tuai rumah ke nyadi pun semua pengawa ba rumah. Taja pan ukai reti nya iya enda tau enda nemu semua adat asal, beburung enggau utai bukai.

Tang selalu kitai tetemu ka tuai rumah endang sigi nemu adat asal Iban.

Nyadi ba pengawa bukai baka beburung enggau utai bukai nya tau enda ibuh nemu laban tu endang bisi orang ke nemu burung enggau mimpi. Pia mega baka mela burung enggau mimpi nya tau dikereja orang kebukai, enda ibuh tuai rumah.

Nyadi tuai rumah tu ending sigi dikarap ka ulih megai, nyaga sereta nanggam adat ba rumah panjai. Iya mega dikarapka ngadu ke laya enggau penyarut ke bisi nyadi antara nembiak iya.

Ketegal tu tuai rumah enda tau enda sikar lalu nemu atur enggau adat. Iya endang orang ke dipadu ngatur laya, chara enggau utai bukai ngena jalai ke lurus lalu enda bechiping. Nadai ulih baka ke bisi betiki ka pinang bisi betiki ka nibung.

Orang ke dichiri nyadi tuai rumah dulu menya endang orang ke nemu tusut sereta mega nemu tusun asal penatai enggau semua pengawa enggau atur bumai betupi.

Taja pia kemaya aritu, rebak ke dudi agi tuai rumah ke nemu tusut udah nadai tentu agi.

Taja pia, sida mayuh agi orang ke udah besekula, lalu bisi pemandai macha enggau nulis. Sekeda ari sida nya endang orang ke nemu pasal adat asal kitai Iban mega.

Lebuh ke ngatur leman tauka penyarut, laya sida serumah, tuai rumah enda tau enda nemu tusun tunggu nunda ka adat kitai bansa Iban.

Ba senentang tu iya tau ngulih ka atur penyampau ukum tauka tunggu ari dalam bup.

Nitihka bup “Iban Adat & Augury”, tuai rumah dalam menua Bagi Kedua ulih nunggu orang ke salah enggau penyampau ke enda sebaka enggau ukum tunggu baka ba opis pelilih menua enggau atur pengulu.

Ukum ari tuai rumah siti siti menua nadai tentu sebaka enggau tuai rumah ke bukai. Tang enti laya tauka penyarut nya dibai ngagai pengulu tauka opis pelilih menua sida ngena atur penyampau ukum baka ke sigi ditetapka dalam Tusun Tunggu kitai iban,ianya undang undang kitai iban.

Enti penyalah nya besai baka salah nyadi tauka baka anak beleman enggau apai, tauka enggau indai, enggau diri menyadi, enggau aki tauka ini, pengawa nya tau ngudika menua.

Kudi tu reti nya menua dipangka kabut, nyitar, kilat tauka tasah laban bah besai.

Iya mega tau ngerusak utai tupi, ngampuhka rumah, ngerusak utai bukai sereta munuh mensia. Ba Kut Mejistret seduai ke ngudika menua nya tau dukum sepikul setengah siku.

Tu nitihka rekomen bala Pengulu. Dalam bagi menua bukai, baka ba Batang Rajang, Tuai Rumah enggau Pengulu ngukum tauka nunggu orang ke salah ngena Mungkul. Siti mungkul nya sama rega enggau seringgit.

Enti penyalah nya lempung agi, Tuai Rumah ngena jalai ukum tauka tunggu ke lempung tauka mit agi baka enggau penyampau telu manuk, paku lawang, mangkuk, chapak enggau pinggai.

Tunggu nya dikumbai se-uta iring manuk. Nyadi selalu dikena nimbang penyalah ke lempung sereta mega dibayar bala pengari baka bala pangan enggau kaban belayan orang ke empu penyalah.

Ba sekeda menua ulu, mayuh kitai Iban agi bisi meri ukum Sigi Jabir enggau penyampau duit 50 sen, iya nya setengah ari penyampau seringgit.

Nyadi iya dikumbai Jabir Iban. Nyadi seringgit nya dikumbai Jabir Perintah. Tang diatu utai tu jarang dikena.

Nyadi ukum nya pulai ngagai Tuai Rumah tauka dibagi bala Tuai Rumah ke ngatur.

Enti nyema ka penyalah orang nya udah ngasuh ari kudi, seduai dua iku tauka sebarang sapa ke ngudika menua enda tau enda munuh dua iku babi sepa tauka babi lelaki ke udah tumbuh taring. Nyadi darah babi dua iku nya lalu ambi ka genselan menua ke udah kudi.

Sida ke salah nya enda tau enda ngemansutka sebilah duku, kebuk enggau beliung. Kebuk nya empu Tuai Rumah. Duku enggau beliung nya empu orang ke nyemelih babi.

Nyadi dulu menya enti orang bisi tebunuh ka siku mensia bukai ketegal saru, orang ke munuh nya enda tau enda mansutka pati nyawa iya nya dua igi tajau lama.

Enti nadai tajau iya enda tau enda nyerahka ulun sida ngagai orang ke empu pemati kena nganti nyawa iya ke mati.

Bala peturun iya lalu enda tau enda nyadi ka ulun orang empu pemati enti sida enda ulih mayar tauka nyendia utai nya tadi. Sida iya tau lepas ari nyadi ulun enti orang ke empu pemati nya ngampun penyalah sida lalu ngelepas sida ari ukum nya.

Bakanya mega enti lebuh maya ngayau bala diri sebala bisi tebunuhka pangan diri ari tegal saru tauka kebuah bukai, iya mesti meri pati nyawa dua igi tajau lama ngagai orang ke empu pemati.

Enti enda, iya mesti nyerah ka diri nyadi ulun orang nya datai ka iya ulih meri pati nyawa munyi nya tadi.

Bala peturun iya pan sama nyadi ulun orang nya mega.

Lebuh maya bisi orang ditemu butang, Tuai Rumah enda tau enda munuh manuk ambika enselan tekala nya.

Utai tu enda tau enda diaduka enggau jampat. Kebuah pia, takut ka laki tauka bini seduai ke udah ditemu butang nya malas tauka ngemedis enggau jalai kasar seduai ke salah butang.

Enti utai bakanya bisi nyadi ari tegal Tuai Rumah laun munuh manuk sereta laun madah ngagai sida serumah bukai, Tuai Rumah nya empu tau kena ukum. Kelia mayuh orang bebalas ngena jalai kasar datai ka bepantap.

Utai ke baka tu bisi udah kala nyadi mega, kurang lebih 30 taun ke udah tu orang siku kena jil ketegal iya mantap siku lelaki ke ditangkap butang enggau bini iya.

Lelaki ke dipantap iya nya lalu mati dia. Tang iya ke mantap enda kena ukum bunuh, tang kena jil lima taun aja.

Kebuah iya enda kena ukum bunuh laban seduai ke butang nya kena tangkap maya seduai iya beleman in flogrante delicto. Nyadi lelaki ke ngeleman bini iya nya kena pantap lalu mati ba endur seduai ke butang.



BESI

Asal kitai Iban nemu beburung

SEKEDA ARI BALA KITAI IBAN KE BISI GAWA DI KELANTAN



Penemu beburung tu datai ari ajar Sengalang Burung ngagai uchu iya Sera Gunting

Asal kitai Iban nemu beburung nya bepun ari ajar Aki Lang Sengalang Burung, Aki Jugu Menaul Tuntung ngagai uchu iya Sera Gunting, anak Dara Tinchin Temaga seduai Menggin (Sebedau begulai enggau Menggin, Dara Tinchin Temaga, iya nya anak tuai Sengalang Burung udah belaki ka Ketupung.)

Sengalang Burung madah ngagai uchu iya Sera Gunting semua utai dikereja mensia deka bechuanka padah enggau munyi burung tujuh iku – Ketupung, Beragai, Embuas, Bejampung, Pangkas, Kelabu Papau Nyenabung enggau Kunding Burung Malam – ke nyadi menantu iya (Sengalang Burung).

“Semua bala aya nuan, menantu aku tujuh iku nya nyadi ka pengari aku lalu ngenataika pesan enggau padah aku ngagai anak mensia,” pia ku aki iya madah ngagai Sera Gunting.

Ninga bakanya, Sera Gunting lalu nanya sekalika nyawa burung Empulu, Empitu, Engkerasak enggau Kunchit tau ambi ka burung. Aki iya madah nyawa sida nya enda tau ambi ka burung laban sida nya ulun iya magang.

“Semina nyawa bala menantu aku aja ti tau ambi ka burung. Nyawa Nendak, ke berumah numpang ba ujung tanju bala menantu aku tau ambi ka burung enti burung Nendak bisi dipeda terebai meraka jalai ari mua orang ke bejalai, enda kira ari kiba tauka ari kanan. Tang nyawa iya semina tau ambi ka burung enti bisi munyi burung bukai udah didinga dulu ari nya,” ku aki iya.

Udah nya Sengalang Burung lalu ngajar Sera Gunting nama reti munyi burung lebuh baru deka belabuh bumai, bepun ari nurun manggul. Nyadi ku iya, enti ba serantu jalai nurun manggul kitai bisi ninga Ketupung, anang enda mabak anak kayu ambi ka tambak burung. Lalu enti apin lama udah nya lalu bisi ninga Beragai, nya burung ti manah madahka bulih padi.

Enti bisi mai tambak burung udah bekau ninga Bejampung, lalu apin lama udah bekau nya bisi ninga nyawa Embuas, nya mega siti burung manah madahka orang nya bulih padi ba taun nya. Nya dikumbai burung Buruk Penyedai, reti nya orang nya deka ngaga tiang rumah endur engkah padi nya lentur deka patah ketegal pemerat padi ti mayuh ulih sida.

Nyadi enti orang nya bisi mai tambak burung udah bekau ninga nyawa Embuas lalu apin lama udah nya bisi ninga Bejampung, nya pan burung ti manah dikumbai Pesuk Bandir, reti nya reban deka angus lalu api makai bandir. Kebuah manah umai angus awakka tanah endur nanam padi nya ami, lalu iya deka tumbuh galak.

Enti orang nya ba serantau jalai ke umai bisi mai tambak burung udah bekau ninga Ketupung lalu enda lama udah nya ninga Bejampung, nya burung pengabis jai. Nya sumpah ari iya empu (Sengalang Burung) awakka anak mensia ninga orang sebilik nya makai asi pana (asi orang ngulit) udah bekau siku ari sida sebilik nya parai ba taun nya.

Enti nyawa Bejampung didinga ba serantau jalai deka manggul, lalu udah nya ninga Ketupung, nya siti burung enda manah dikumbai Burung Beperai. Reti nya burung nya ngayuka dukun deka nunu kemenyan lebuh ngubat siku ari sida sebilik nya sakit ba taun nya.

Lalu enti nyawa Beragai bemunyi dulu ba rantau jalai ke umai, lalu udah bekau nya ninga nyawa Bejampung, tu mega siti burung jai ke ngayuka pua kumbu digantung ambi ka sapat orang rabat ba ruai sida nya. Reti nya siku ari sida sebilik nya deka nyau (parai) dalam taun nya.

Nyadi enti bisi mai tambak burung udah bekau ninga Embuas, lalu udah nya ninga Pangkas, nya pan siti burung ti jai. Nya pan madahka siku ari sida sebilik nya deka parai ba taun nya. Lalu enti bisi ninga Beragai, udah bekau nya lalu bisi ninga nyawa Kelabu Papau Nyenabung, burung tu ngayu ka ai mata ari sabak sinu ketegal siku ari sida sebilik parai dalam taun nya.

Tang enti ninga nyawa Beragai ba rantau jalai ke umai, lalu udah nya ninga Ketupung, nya siti burung manah. Iya ngayu ka tali ma kena mai padi baka lanji, sintung enggau selabit selalu deka ditukar laban selalu kena mai padi ti mayuh sereta berat.

Kena iya ngujungka ajar iya ba renggat nya, Sengalang Burung madahka udah lepas tujuh bekau manggul, lebuh maya nebas, enti ninga nyawa Kelabu Papau Nyenabung, nya burung ti manah. Iya nyadi ka pengelindung tauka pengerabun umai awakka enda kena peda bala jelu jai enggau semua utai ke ngachau umai enggau penumbuh padi.

Nyadi diatu kitai sama nguji nyenguk enggau silik agi siti atur pengawa beduduk ari penemu pasal beburung nitihka ajar Sengalang Burung ngagai uchu iya Sera Gunting nya tadi, iya nya atur pengawa ke dikumbai Gawai Burung.

Dijangka ke aku mayuh bala kitai diatu enda tentu nemu nama utai ke dikumbai urang Gawai Burung. Kebuah pia laban pengawa tu jarang dikereja kitai kemaya ari diatu, ketegal mayuh bala kitai Iban udah muai pengarap lama. Tang kitai anang semina ninga nama gawai nya aja, lalu enda nemu reti iya. Enda salah enti kitai nyidi tauka betanya ngagai urang ke tuai ka nemu senentang pangawa tu. Sayau kitai bansa iban tu enda nemu reti pengawa asal bansa kitai empu.
Nyadi lebuh orang tuai menya nirika Gawai Burung, utai nya dikereja sida betangkan-tangkan, laban sida nampung gawai apai indai sereta mega bala aki ini sida ke enda tau enda orang ke pugu menua, lalu bisi mega ngembuan tampun enggau tusuk. ( bisi ngembuan pala dengah aki ini sida.)

Bala orang bukai ke ukai nampung apai indai aki ini sida, tang bisi mimpi lalu diasuh antu begawai, tau begawai Sandau Hari, tauka niri Gawai Mata. Bisi siku dua orang tuai kelia diasuh antu dua kali ke tanju tegal iya sakit. Nyadi sida nya niri mega gawai tang tiang kalingkang sida ari munti, laban nya ukai niri ka Gawai Burung nampung gawai bala apai indai iya.

Enti orang deka niri ka Gawai Burung beserak enggau gawai bukai baka Gawai Batu, Gawai Tajau tauka Gawai Antu, Gawai Burung enda tau sekali-kali dipenyadika dudi ari gawai bukai. Lalu pia mega enti gawai bukai ke ukai Gawai Burung beserak enggau Gawai Antu, iya enda tau enda dulu dipenyadi ari Gawai Antu, enggai ka tuak gawai kena keregau Indai Bilai (lalu jadi masam tauka jai).

Orang tuai menya mega bisi ga didinga kitai ngenang pasal orang ke begawai kelia nambahka pala sigi ke nurun ari tampun tuai gawai. Enti bakanya, pala sigi ari siti-siti tampun bukai dalam rumah nya enda tau enda sama diturunka mega. Lalu semua bilik orang ke ngembuan tampun ba rumah nya enda tau enda munuh siku babi sepintu ambika dipeda atau iya. Nyadi babi ke dibunuh kena niri ke tiang gawai nya dikumbai babi sengajap, lalu enda ibuh dipeda atau.

Pengawa ke nyendiaka gawai nya mayuh amat leman enggau pengawa, belabuh ari sida indu ke nutuk beras ka pun beram (kena ngaga tuak). Alai pengepun sida ke nutuk nya ba ruai orang ke nirika gawai nya ba pugu tanju laban dia meh alai endur orang duduk nasak enggau endur penuduk Sengalang Burung enti iya datai ngabang. Bala indu bukai ulih nutuk ba endur selama.

Udah nya mayuh mega utai dikereja orang serumah nya kena nyendia ka diri deka begawai. Sida deka begagaka raran kena ngelulun asi, lalu bisi mega ngaga pantar ai. Kedua-dua iti utai nya enda tau enda digaga ngalih ari ulu pendai. Maya pengawa nya, orang di rumah pan lalu begendang kena ngerami diri.

Udah tembu pengawa begagaka tuak, orang ke empu gawai lalu berundingka utai ambi ka lauk. Dulu kelia lebuh nengkira lauk kena begawai, sida deka begerah nubai enggau ngasu tang nyau dudi tu agi sida baum meli kerebau, chapi enggau babi sereta manuk.

Sida mega dulu nyendiaka perengka enggau utai ambi ka piring. Orang ke begawai nya lalu turun begiga ka utai babas ambi ka perengka piring baka buah pisang jait, buah engkudu, daun enggau upa lengki, buah enggau upa banjang, upa batak, bunga tanam ba umai baka bunga buot enggau bunga tepus. Nyadi enti bisi salai ikan, salai gerama enggau salai bukai, semina salai ikan sebayan baka keli enggau belau enda diguna laban dua bengkah salai nya untung Indai Bilai.

Udah perengka piring ari babas ulih magang, nya baru sida ke indu belabuh nyendia ka leman piring ke tau bari baka asi pulut, penganan iri, ketupat, sungkui, telu, letup enggau sagun. Enti semua utai nya udah sedia, nya baru tuai gawai baum ngatur orang ngambi ngabang. Menya rumah panjai mayuh jauh pejalai ari sebuah-sebuah taja pan bisi mega ke enda bangat jauh. Kenu ku jerita tuai, orang ngambi ngabang nya ngena temuku tali ke enda tau enda dibuka tiap hari sampai abis. Nyadi diatu, menua nyau semak agi laban udah jauh maju lalu orang bepadah pan ngena surat tauka bepesan ba radio.

Pengawa ke terubah dikereja orang ngepunka gawai nya Nimang Pantar , nya malam kejang hari pengabang datai. Pantar nya digaga pagi nya udah bekau tuai gawai begerah ngasuh orang ngaga pantar. Nyadi lebuh ke ngaga pantar nya gendang rayah dipangkung tiga renggat.

Pantar nya digaga ba antara ruai enggau tempuan lalu digaga seretai sekayu rumah nya, taja pan orang bukai enda tau enda nganti tuai gawai belabuh ngaga dulu. Udah nya baru manuk dibiau kena begerah bepadahka sida serumah belabuh nganchau tikai nyendiaka nimang pantar.

Sepengudah beranchau tikai, lalu dua iku ari sida serumah di asuh ngirit chapan siti siku ke setak ili, siku ke setak ulu, mupu ka Antu Rua. Utai ke diberi ari sepintu-sepintu bilik nya mayuh macham utai ke udah jai, enda diguna agi baka gari genuk, gari periuk, gari sepit, enggau utai bukai.

Sereta udah tembu mupu nya baru rumah nyambut orang ke diasuh nasak, iya nya miring ka Gawai Burung. sida tu udah disambut di tanah, dialu enggau gendang. Datai orang ke ngalu iyaka ba tanah, sida lalu nanya ka burung iya. Enti bisi burung orang lalu ngadu ka ai burung, enti nadai orang ngaga ai untung iya dikumbai ai dua ratus dipedua iya enggau tuai gawai. Reti seratus nya sepuluh iti gelas penuh disi ai tuak.

Udah abis pengawa ngaluka iyanya tadi di tanah nya baru mai iya niki lalu dialuka sekali agi enggau chukup basa ba ruai tuai gawai. Iya mega diuntung mayuh macham ai tiki bepun enggau ai basu.

Lalu udah tembu niki orang nasak nya baru ngalu penatai bala lemambang. Enti bisi burung, orang lalu ngatur bela burung nya nyengkaum ngasuh sida bejalai niti lesung tujuh iti ba tempuan, sema ka sida bisi kena pimpin burung bisa. Sida lalu dialu bejalai niti ruai, dienjuk ngirup.

Nyau baruh hari baru orang nasak ngetas sigi antu pala ari siti tampun tang enti siti aja tampun ba rumah nya, iya deka ngetas tiga igi. Apin ngetas antu pala iya deka kena biau dulu enggau manuk. Udah nya ila lalu manjung panjai tiga telian. Pala ke udah diketas nya lalu di engkahka ba chapan, lalu di pangkangka enggau piring.

Orang nasak nya tadi lalu nurun ka kenyalang lama (kayu) ari sadau, enti bisi. Enti antu pala enggau kenyalang sama udah datai, setunggul mansau dua iti lalu digantung ba tulang perabung ba setak-setak.

Tuai gawai pan lalu miau ka bala mayuh ngena manok sereta lalu begerah miring. Keterubah iya, sida ngaga piring ka pandung besai ba ruai tuai gawai. Sida miring ba pugu tanju. Udah badu miring dia baru sida ngaga piring ka tiap iti pandung mit pemanjai rumah nya.

Udah badu makai lemai nya baru tuai gawai miau ka manuk baru kena ngerandang jalai. Dia orang ke nasak nya berayah niti ruai, berandang jalai. Lebuh nya orang begendang rayah panjai, datai ka randang nya tembu.

Enda lama udah nya lemambang lalu belabuh mengap. Nyadi pengap sida numbas pemanjai laban iya ditampung baru lebuh malam gawai nyadi. Kelimpah ari mengap, nadai batang pengawa ke benama. Tang sida selalu deka ngerami rumah enggau begendang panjai ke alai orang ngajat, bepencha, bekuntau, main chekak enggau main bukai.

Ba bala rebak ka dudi diatu, pengerami Gawai Burung tu amat jarang endar bisi diatur, tang enti nyema bisi pengerami tu, bala nembiak dipelabaka gagit agi deka mantai ke pengerami baru nyengkaum belagu karaoke, main band tauka poco-poco enggau sekeda pengerami bebuti betundi ke bukai enti pengerami begawai nya udah tembu diatur.







BESI

Penemu kitai kelia bepanggil begau minta sah

EX TR BANYAN ENGGAU MENYADI IYA PEMANCHA JANTAN


Terantang tawak kena kitai minta sah bala beguai maya tusah, temuku tali kena kitai bebai nurun ngayau

Sebedau kitai bansa iban ke bekena ka jalai tulis tauka bepanggil ngena surat, tuai kitai raban bansa Iban baka Pengulu enggau Tuai Rumah ke dulu menya endang sigi ngemeran ke ngena jalai asal kitai bansa kena bepanggil tauka bekangauka mensia mayuh mensia banyak, tauka bekangauka sekeda mensia datai ngulu pechara sereta mega pengawa bukai tauka maya minta bantu beguai ari bala mayuh lebuh bisi penusah ninggang rumah sida iya rambau maya nya kelia.

Sekalika iyanya maya ke bisi penusah angus rumah, bisi orang mati bebadi, kena pangka kilat, kena tambun tanah tusur, tabanka tanah runtuh, ampuh bah tauka kena serang kayau anak tauka minta sah laban kena alah laban bala munsuh enggau mayuh bengkah penusahka bukai ke bisi nuntung, orang tuai kelia endang bekangau tauka bepanggil ngena chara enggau jalai asal bansa kitai empu. Jalai nya enda bula nyelaie didinga ke kitai ke rebak baru kemaya ari diatu, tang iya cukup ngasi ba raban bansa kitai bansa Iban empu, laban nya meh chara enggau jalai ti endang dititih sereta dikemeranka aki ini kitai ari dulu kelia lalu nyentukka ke kemaya ari diatu, lalu adat nya sigi amat ngasi ba kitai bansa iban.

Dulu menya, enti tuai kayau tauka tuai serang deka bekangauka mensia mayuh awakka sama nurun ngayau sereta sebala, iya ngirumka temuku tali ari rumah iya lalu dibai ari endur siti ngagai endur siti. Nyadi sama ditanchang enggau temuku tali nya selambar bulu manuk enggau siti rangkang ke udah angus ditunu setengah.
Selambar bulu manuk nya ngemai reti, semua utai ke ditanchang sama dia enda tau enda dipejalaika ari rumah siti ngagai rumah siti enggau naka penyampat enggau pengelengkas iya.
Bulu manuk nya nyadi ka tanda tauka nyadi lambang iya mesti lempung sereta laju dipejalaika bala ti udah ditesau tuai nya tadi. Bakanya mega rangkang tauka kayu mit ti udah setengah angus ditunu nya ngayuka baka reti sempun ulih ambika tenggau lebuh bejalai malam. Reti nya semua perengka ke dikena bekangau minta tulung minta saup enggau minta sah nya enda tau enda mindah dipejalaika ari rumah siti ngagai rumah siti enda ngira ari siang malam tauka petang.
Semua utai nya endang enggau naka penyampat diasuh bejalai mindah ari rumah ke rumah ngichaka iya lengkas datai ba adan iya tauka orang ke dipadah sama enggau nurun ngayau nya tadi. Semua rengka enggau kelapung iya enda tau ngetu ngapa dipejalai ka enti sida bedau datai nuntung ba rumah ke batang d’ambi sama dibai enggau ngayau enggau mulau dulu menya.

Pesan ka bebai ke bala nurun ngayau nya mesti ditusui tauka dipadah enggau leka jaku. Barang sapa ke di asuh tuai ngenataika utai nya tadi enda tau enda nusui ngagai orang ke dituju kangau tauka panggil nya. Siti temuku ba tali nya baka ka mai reti berapa ari da timpuh utai ke di pesan nya tadi deka nyadi. Siti temuku nya ngemai reti sari.

Ninting pagi udah kerebak tawas siti temuku nya enda tau enda dibuka simpul iya sampaika iya abis. Ba senentang tu, lebuh pengabis temuku tali nya dibuka, semua bala anak pungka laki enggau bala manuk sabung ke deka nurun ngayau enda tau enda udah sama datai begelumu ba rumah tuai kayau ke ngirumka panggil nya tadi.

Nyadi kelimpah ari bakanya tadi, bisi sebengkah mega cara dikena sida ka nyadi tuai dulu menya, orang ke nyadi tuai kayau bisi mega udah kala bekena ka jalai nyelaie mimit ari nya tadi,utai ke di kena sida ke betesau ke bala anak pungka laki enggau bala manuk sabung iya ke chukup taluk sigi dikarap, awak ka sama nurun sereta ngayau ari rumah tuai sida. Jalai siti ke bisi udah dikena sekeda tuai kayau menya, iyanya bekena ke jalai bekirum ka sangkuh ke naka iya chukup penajam lalu dibalut ngena bulu buok munsuh.

Lebuh tanda panggil nya datai ba sebuah-sebuah rumah bala manuk sabung enggau bala pungka laki, orang ke kena tuju tesau nya enda tau enda nyendiaka diri bengepan sereta siap enggau senjata perang sida, baka terabai, sangkuh, nyabur, gansai, sumpit, ipuh, pemalu beduri, pedang, ilang, sereta keresa bukai ke diguna lebuh maya besatup enggau bala munsuh lebuh rambau maya nya kelia.

Sekeda ari perengka enggau senjata bukai ke disediaka sida mega nyengkaum langgai tingang, bujak, perambut sereta mega berayang.

Sekeda ke bisi udah kala ditulung serta diberi antu utai, lalu nyendiaka pengaruh kebal, empelias enggau utai bukai baka batu tauka ubat engkerabun ngambika enda dipeda munsuh lebuh maya ke ngayau besatup belaban enggau bala munsuh rambau musim sida ia ka matak serang nya tadi.
Nyadi jalai kangau beperang ke munyi nya tadi udah diketuka ba taun 1900.

Nyadi lebih kurang urung iya dalam taun 1900 ngagai taun 1922 enti Pengulu deka bepanggilka orang bechara, iya deka ngirumka labung pengulu iya ngagai orang ke d’asuh iya datai bechara. Labung nya meh, nyadi ke tanda kuasa sida pengulu ke ngatur chara enggau laya mensia mayuh rambau maya nya. Udah nya, pengulu mega bisi manggil orang datai bechara ngena jalai bekirumka tungkat rutan ke bisi ngundan gambar makota Rajah ba ujung ari pala tungkat nya. Tungkat tu d’anjung ari rumah panjai sebuah ngagai rumah sebuah nyentukka iya datai ba orang ke dituju kangau tesau iya.

Ngambika orang nemu pesan tauka panggil nya beguai, iya dikelapung ke enggau bulu manuk sereta rangkang tauka kayu mit ti udah setengah angus kena tunu.Iya mega mai reti semua utai nya enda tau enda dipejalaika siang malam tauka petang. Semua utai nya nadai tau diketu ke ngapa, enti iya bedau nuntung ba orang ke dituju iya tesau nya tadi.

Enti nyema rumah panjai bisi ditemu enda bejalaika pesan nya, tuai rumah nya deka ditinggang ukum tunggu lima kati (RM3.60) ari pengulu. Enti nyema iya enda ulih mayar tauka enggai mayar ukum nya tadi, tuai rumah nya ulih kena ukum jil empat bulan.

Kenyau ari taun 1930 menya, tungkat ari pengulu dikelapung ka enggau siti surat. Iya mega dikirum ke ngena jalai ka sebaka enggau ke dulu ari nya, ari siti endur ngagai siti endur nyentuk ka iya datai ba orang ke dituju kangau enggau panggil nya. Nyadi chara kitai ke bepanggil betesau ngena utai ke baka nya tadi lama udah diketuka kitai raban bansa, laban ke nitih ke singkang dunya ti nyau udah jauh mansang. Kebuah pia semua utai ke rambau kitai rebak baru diatu dipanggil enggau surat kangau enggau talipaun nitihka atur ke udah diletakka perintah kemaya aritu.

Batang kenang nya tadi atur jalai manggil bekangau minta orang nya datai semua, datai sereta baka lebuh maya bisi penusah, tauka minta sah lebuh deka nurun ngayau dulu menya.

Tang siti jalai ngemegauka orang mayuh minta sah, minta bantu, minta tulung orang datai beguai, kelebih agi menua ke numbas iya penyauh ari pangan diri,iya nya ngemegauka orang ngena terantang tawak.

Nyadi dalam atur tu dulu menya, nyentukka seharitu, setawak sigi agi dikena ngemegau diri serumah, diri segenturung menua, enggau orang rumah panjai ke agi ulih ninga munyi terantang setawak nya.

Penanggul ke suah agi dikemegauka ngena terantang setawak nya penusah orang udah ninggalka dunya injau tu, tauka dikena bepadah sereta ngemegau ke bala mayuh bisi urang udah parai. Reti nya, enti orang nya sigi udah ditemu lama sakit, nama orang bisi ninga terantang setawak panjai tiga kali bejurut, reti nya orang ke sakit nya udah ngapuska seput. Tawak nya diterantang baru enti bangkai iya udah dipansutka ngagai sapat ba ruai. Lalu pia mega dalam adat pemati ke bisi dikena ba ai Krian enggau Saribas, setawak nya diterantang panjai tiga kali bejurut enti lebuh maya bangkai orang nya baru deka nurun d’anjung ngagai pendam.

Atur terantang tawak munyi nya tadi agi dikena nyentuk ka saritu di menua pegai Betong, Debak, Saratok enggau Roban, lalu bisi mega dikena ba sekeda kandang menua bukai baka ba menua Batang Rajang, Kemena, Batang Lupar enggau Baram enggau pati ai sida iya.

Kelimpah ari penusah parai, setawak mega diterantang orang rumah panjai kelia enggau diatu kena minta sah dalam semua penusah ke udah ditulis dulu tadi, baka penusah rumah angus, ampuh bah, kena serang munsuh (dulu menya) tauka penusah bukai baka kena taban tanah tusur, tekusai pangka kabut sereta enggau penusah sereta tasah bukai.

Tau mega kena ngemegau bala bukai minta sah enti diri serumah bisi penusah lenyau, lemas tauka lesap ba ai baka diterekam baya, enggau mayuh penusah ke bukai.

Taja pan pengawa ke baka nya tadi jarang bendar nyadi rambau kediatu,tang utai tu sigi suah nyadi kelia, lalu pangkung tauka terantang setawak nya meh ke udah chukup beguna besai kena ngemegau sereta nesau bala diri sebala ke numbas penyauh alai diau, sereta disadang mudah ulih datai ngesah sereta mantu dalam penanggul ke dikemegauka kitai.

Bepun ari tu meh, setawak nya enda tau diterantang ngapa enti nadai kebuah. Lalu pangkung tauka terantang begau nya mayuh bengkah bunyi, laban sebengkah nya ngayuka sada ke enda sebaka reti. Ngambika banding, enti terantang panjai enda ngetu nya, reti iya madahka bisi penusah besai minta bantu tauka sah tekala nya sereta chukup beguai.

Nyadi kemaya haritu, mayuh bala nembiak rebak baru ke enda nemu ulu ili senentang pekara tu. Tang nadai ga nya ngawa laban semua pekara tu nadai dikena kitai agi. Laban menua udah mansang, semua diatu ngena jalai moden magang - ngena surat, talipaun, internet tauka media massa. Sama bekenang meh kitai ke utai nya tadi,taja dunya udah jauh mansang tang bisi maya iya dudi ari agi tau dikena kitai mega chara ke baka nya.



BESI

Rumah panjai meh bunsu pengidup kitai Iban kenyau ari kelia

BALA TUAI TAUKA BIAK SAMA BEGULAI NGATUR PENGERAMI DI KERANGAN PAGI GAWAI




NGINTU BABI KENA MALAM GAWAI DI KERANGAN










Iya mega pun adat asal bansa kitai Iban ba pengawa bumai betaun enggau semua jalai pampang kereja ti digaga kitai besari sari kena ngidup kediri.

Rumah panjai tau dikumbai bunsu pengidup kitai Iban ari kelia nyentuk ka saritu kelimpah ari ke nyadi pun adat asal kitai Iban dalam pengawa bumai betupi sereta mega semua pampang pengarap asal kitai Iban kena bumai, ngemerankan ruang bilik ke likun enggau menyana enggau atur pasal pengerai pengidup.

Nyadi ketegal utai ke baka tu, niap iku tubuh urang ke nguan siti rumah panjai nya mesti bisi kena serangkung dalam semua atur penyerakup, nadai ngira tuai biak. Kaul diri menyanak, diri sebilik endang siti ari utai ke beguna. Kebuah pia laban niap iku mensia ke bisi ba rumah panjai nya enda tau enda bebasa ka pangan diri.

“lalu pia mega baka bala sida ke anembiak endang dilalau awak ka bebasa ka orang ke tuai agi, lebih agi apai indai, aki ini diri empu.

“Nya kebuah nyentuk ke saritu semua orang serumah kenyau ari menya endang mayuh agi bala diri sebilik. Sida kiruh amat ka pengidup pangan diri,baik ke senang tauka tusah. Enti senang, semua senang. Enti bisi penusah, semua sama besaup ngelempungka iya. Nadai beteju ke pangan diri nangkup penusah nya sepintu bilik aja.

“Enti nyema bisi bulih ngasu beburu, bulih jelu, sigi d’emparu sama segulai enggau diri serumah, lalu pia mega enti bulih ikan bulih undang enggau pemakai bukai endang selalu bebagi enggau pangan diri serumah, nadai kala d’empa nengali,”. Jarang bendar kitai meda diri serumah enda bebagi ke macam utai enggau pangan diri.

“Ka tambah nya mega, enti nyema bisi buah baka engkeranji, sibau, kembayau, rian, pakan enggau buah ke bukai, bala orang ke bempu pun buah nya menya seruran ngemai bala sida serumah bukai sama niki, lalu bebagi sama bela,” nadai be engku mayuh ketegal ke ngempu pun buah,ngenuan mimit laban ke dibai aku ngembuah pun buah aku.

Ba pengidup rumah panjai dulu menya, lalu agi mega dikena sekeda orang ke diau di rumah panjai nyentuk ka diatu, semua atur gawa, turun enggau bumai, endang sama bela besaup ngambika jampat tembu tauka teputar.betukar duruk enggau pangan diri nyentuk ke utai tembu dikereja.

Enti sema disebut ka beduruk, orang menya gagit bendar deka beduruk enggau pangan diri laban rindu gawa bebala mayuh, sereta mega kena neguhka tanggam kaul enggau diri serumah.

Nya meh kebuah orang rumah panjai balat ngemeranka pemanah kaul sereta basa enggau pangan diri. Ari utai ke baka tu sida udah selalu diberi petara ke nyaga sida pengelikun sereta mega pengelantang begulai enggau pangan diri.nadai ngemuan pengeringat enggau ati ransi ngagai pangan diri ti enggau begulai besari sari.

Nya meh kebuah nyentuk ka seharitu rumah panjai endang nyadi palan ke dikesayau ke semua kitai Iban, lebih agi iya ke endang agi angkun ka pendiau begulu baka ba rumah panjai ke mai mayuh bengkah penguntung ngagai semua kitai.

Kitai mega bisi ngasai ka, enti lebuh maya bisi pengerami, kelebih agi Gawai Dayak ke d’intu kitai iban ninting taun, bala kitai Iban ari nengeri sigi gagit amat deka pulai begawai ba rumah panjai, laban dia meh alai ti andal sereta angkun ati berami. Kelebih agi ulih betemu enggau bala kaban belayan ke jarang ulih enggau betemu.

Mayuh agi pengerami Gawai kitai ba nengeri nadai banding enggau Gawai ba rumah panjai, laban intu rumah panjai nadai ngemeranka pangkat, renggat umur enggau pemisi, tang dikira sebaka magang.semua segulai sejalai lantang ati begulai enggau pangan diri ngintu berami gawai.

Sekayu rumah anembiak redak endang sigi nemu sida mesti bebasa sereta sama besukung ka tuai rumah ke nyadi pun semua pengawa ba rumah panjai. Taja pan ukai reti nya tuai rumah enda tau enda nemu semua adat asal,main asal, beburung enggau utai bukai. Tang suah agi kitai nemu,jarang tuai rumah enda nemu dalam semua utai nya tadi. Kitai milih tuai rumah tu beduruk ari pengelandik enggau pemandai tuai rumah ngempung sereta nemu semoa pengawa kitai iban.

Nyadi ba pengawa bukai baka beburung enggau utai bukai nya tau enda ibuh nemu laban tu endang bisi orang ke nemu burung enggau mimpi. Pia mega baka mela burung enggau mimpi nya tau dikereja orang bukai, enda ibuh tuai rumah.

Nyadi tuai rumah endang dikarap ka ulih megai, nyaga sereta nanggam adat ba rumah panjai. Iya mega dikarapka ngadu laya enggau penyarut ke bisi nyadi antara nembiak iya.

Ketegal tu tuai rumah enda tau enda sikar lalu nemu semua atur enggau adat. Iya endang orang ke ngatur laya, chara enggau utai bukai ngena jalai lurus,enda tau bechiping ati. Nadai ulih baka ke bisi betiki pinang bisi betiki nibung.

Orang ke dipilih dichiri ke nyadi tuai rumah dulu menya endang orang ke sigi landik nemu tusut sereta mega nemu pasal asal penatai enggau semua pengawa enggau atur bumai betupi.

Taja pia kemaya ari tu, rebak ke dudi agi tuai rumah ke nemu tusut udah nadai tentu agi. Taja pia, sida mayuh agi orang ke udah besekula, lalu bisi pemandai macha enggau nulis. Laban enda nemu macha enggau nulis bisi ka pedis mimit enti bisi utai deka diatur enggau opis perintah. Sekeda ari sida iya nya endang orang ke nemu pasal adat asal kitai Iban.

Enti lebuh ke ngatur leman tauka penyarut, laya sida serumah, tuai rumah enda tau enda nemu tusun tunggu nunda ka adat bansa kitai Iban. Ba senentang tu iya tau ngulih ka atur penyampau ukum tauka tunggu ari bup. Laban utai nya udah bisi dikarang bala kitai iban ke nemu landik pasal adat bansa kitai empu.

Nitihka bup ke digaga niang Benedict Sandin dalam bup ke benama Iban Adat & Augury, tuai rumah dalam menua Bagi Kedua ulih nunggu orang ke salah enggau penyampau ke enda sebaka enggau ukum tunggu baka ba opis pelilih menua enggau atur pengulu. Ukum ari tuai rumah siti siti ai enggau menoa nadai tentu sebaka enggau tuai rumah ke bukai. Tang enti laya tauka penyarut nya dibai ngagai pengulu tauka opis pelilih menua sida ngena atur penyampau ukum,nyadi semua nya sebaka magang atur iya.

Enti penyalah nya besai baka salah jadi tauka baka anak beleman enggau apai, tauka enggau indai, enggau diri menyadi, enggau aki tauka ini, pengawa nya tau ngudika menua.

Kudi tu reti nya menua dipangka nyitar, kilat tauka tasah laban bah besai. Iya mega tau ngerusak utai tupi, ngampuhka rumah, ngerusak utai bukai sereta munuh mensia.

Ba Magistrate Court seduai ke ngudika menua nya tau diukum sepikul setengah siku. Tu nitih ka rekomen bala Pengulu. Dalam bagi menua bukai, baka ba Batang Rajang, Tuai Rumah enggau Pengulu ngukum tauka nunggu orang ke salah ngena Mungkul. Siti mungkul nya sama enggau seringgit.

Enti penyalah nya lempung agi, Tuai Rumah ngena jalai ukum tauka tunggu ke lempung tauka mit agi baka enggau penyampau telu manuk, paku lawang, mangkuk, chapak enggau pinggai. Tunggu nya dikumbai se-uta iring manuk.

Nyadi selalu dikena nimbang penyalah ke lempung sereta mega dibayar bala pengari baka bala pangan enggau kaban belayan orang ke empu penyalah.

Ba sekeda menua ulu, mayuh kitai Iban sigi agi bisi meri ukum Sigi Jabir enggau penyampau duit 50 sen, iya nya setengah ari penyampau seringgit.

Nyadi iya dikumbai Jabir Iban. Nyadi seringgit nya dikumbai Jabir Perintah. Tang diatu utai tu jarang dikena. Nyadi ukum nya pulai ngagai Tuai Rumah tauka dibagi bala Tuai Rumah ke ngatur.

Enti nyema ka penyalah orang nya udah ngasuh ari kudi, seduai dua iku tauka sebarang sapa ke ngudika menua enda tau enda munuh dua iku babi sepa tauka babi lelaki ke udah tumbuh taring.

Nyadi darah babi dua iku nya lalu ambi ka dikena genselan menua ke udah kudi. Sida ti salah nya enda tau enda ngemansutka sebilah duku, kebuk enggau beliung. Kebuk nya empu Tuai Rumah. Duku enggau beliung nya empu orang ke nyemelih babi.

Nyadi dulu menya enti orang bisi tebunuh ka siku mensia bukai ketegal saru, orang ke munuh nya enda tau enda mansutka pati nyawa iya nya dua igi tajau lama.

Enti nadai tajau iya enda tau enda nyerahka ulun sida ngagai orang ke empu pemati kena nganti nyawa iya ti mati.

Bala peturun iya lalu enda tau enda nyadi ka ulun orang empu pemati enti sida enda ulih mayar tauka nyendia utai nya tadi. Sida iya tau lepas ari nyadi ulun enti orang ke empu pemati nya ngampun ka penyalah sida lalu ngelepas ka sida iya ari ukum nya.

Bakanya mega enti lebuh maya ngayau bala diri sebala bisi tebunuhka pangan diri ari ketegal saru tauka kebuah bukai, iya mega mesti meri pati nyawa 2 igi tajau lama ngagai orang ke empu pemati.

Enti enda, iya mesti nyerah ka diri nyadi ulun orang nya datai ka iya ulih meri pati nyawa munyi nya tadi. Bala peturun iya pan sama nyadi ulun orang nya mega.

Lebuh maya bisi orang ditemu butang, Tuai Rumah enda tau enda munuh manuk siko ambika enselan tekala nya mega. Utai tu enda tau enda diaduka enggau jampat takutka laki tauka bini seduai ke udah ditemu butang malas tauka deka ngemedis enggau jalai kasar seduai ke salah butang nya tadi.

Enti utai bakanya bisi nyadi ari tegal Tuai Rumah laun munuh manuk sereta laun madah ngagai sida serumah bukai, Tuai Rumah nya empu tau kena ukum.

Kelia mayuh orang bebalas ngena jalai kasar datai ka bepantap lalu bebunuh ke pangan diri. Laban kitai ke bedau bisi perintah ngempung,bedau bisi undang undang ke dipadu ke bala sida perintah menoa baka kemaya ari diatu.






BESI

Lumbung basa pemati ti pemadu tinggi ngagai pungka laki kitai iban.

Lumbung tu basa ba pemati ti pemadu tinggi ngagai pungka laki ke beberita dalam semua pengawa enggau adat kitai bansa iban.


Iya mega sebengkah jalai ti dikena kitai masa bala lelaki ke pegari nama tebilang tampak rita ditemu urang mayuh mungkal menua, matak bala pindah dulu menya.

Bala kitai Iban tu siti ari bansa ba dalam dunya tu ke bisi ditemu ngembuan mayuh macham adat sereta main asal, lalu semua utai nya endang sigi jauh nyelaie ari enggi bansa bukai ke bisi ba menua kitai Malaysia tu empu sereta enggau bansa bansa orang bukai ti ari menua tasik din.

Taja pan pia, sekeda ari raban bansa ti diau ba menua bebukit tinggi,ngambi ke chunto baka di menoa Tibet, Mongolia, Taiwan, Pilipin,lalunya sekeda ari menua Selatan America baka Peru, Bolivia, Chile, Brazil enggau dua tiga iti menoa ba kandang tasik besai Pasifik, bisi mega udah ditemu ngembuan chura sereta enggau ukir tenun kain baju enggau pua ti nyauka sama sebaka enggau pua kumbo kitai Iban. Mina tuju enggi sida iya bisi bida mimit ari tuju guna bansa kitai iban ditu.

Lalu ukai mega ba senentang nya aja ti nyau ka sebaka enggau bansa kitai iban, laban mayuh agi utai bukai ke sebaka enggau enggi kitai Iban,baik ke nya baka jalai pengidup sereta mega sekeda ari main asal sida ia. Ambika banding, baka ba menua Pilipin, bisi siti raban bansa orang di menoa nya ke bempu ke leka jaku sebaka enggau jaku kitai bansa Iban. Kelimpah ari sida ke mega ngembuan chura kain enggau pua tenun ti nyau ka sebaka enggau enggi kitai Iban.

Nyadi siti agi pengawa tauka adat asal ti sebaka enggau enggi kitai Iban nya jalai ngintu pemati, iya nya ngelumbung. Ukai bansa sida tu aja tang sekeda ari bansa ba menoa Amerika Selatan udah mega ditemu bisi ngintu pemati aki ini sida kelia ngena jalai bakanya.

Ba menoa kitai empu, kelimpah ari bansa kitai Iban, bansa bukai baka sida Orang Ulu Kayan, Kenyah, Berawan enggau sekeda bansa ke mit-mit tauka bansa ‘minority’ ba ulu entigis sungai Batang Rajang enggau Baram, bisi mega ngelumbung aki ini sida kelia taja pan kemaya haritu adat nya udah diketuka enda dikembuan sida, iya nya nadai dipejalaika agi.

Nyadi kenang aku dalam pengawa ngelumbung baka ke sekali tu, beduduk ari tusui bala sida ke tuai dulu suba sereta mega ari pansik aku empu ke ngelamatu ari ke bebacha ke ensera enggau jerita kenang pendiau pengidup kitai iban ti dulu menya.


Siti mega bisi penyelaie ba senentang pengawa mati dilumbung tu, bala lelaki ke diberi basa ba pemati dilumbung nya,bangkai sida ia dilumbung ba tanah diri empu, ukai ba pendam lalu enda begulai enggau sempar tauka pendam bala mayuh ke bukai. Dedaga kediri diri nguan ngibun tanah diri empu.

Di jangka ke aku,mayuh kitai bala nembiak ti rebak baru tu, nyangka bisi enda tentu nemu nama utai ke dikumbai urang lumbung sereta mega nama reti pengawa ngelumbung tauka belumbung tu.

enti nitihka reti iya ba siti kamus jaku Iban An Iban Dictionary ari karang AJN Richards edisi 1981, reti jaku ‘lumbung’ tu ‘rarung tauka sentubung ke enda ditumbak tang disimpan tauka ditempara dalam siti langkau tauka rumah mit’.

lalu bakanya mega reti ia ba Dictionary of Sea Dayak karang NC Scot edisi 1956 meri reti lumbung tu ‘siti sentubung endur engkah bangkai enda ditumbak tang disimpan dalam siti rumah tauka langkau mit’. Sentubung nya semina ditempara begantung ari tanah.

Nyadi atur jalai pengawa ti belumbung tu ukai mega semina dikereja kitai Iban aja, tang bisi mega dikereja raban bansa bukai di menoa kitai ditu sereta enggau di menua tasik rambau maya nya kelia tauka dulu agi munyi ke udah disebut aku dulu tadi.

“Ba raban bansa kitai Iban,sapa ti di diberi basa dilumbung nya, semina ngagai orang ke udah kala bulih nama tampak rita bedengah, nyadi pungka laki tauka tinggi pendiau bulih reta tengkira aja tau diberi basa mati dilumbung.

“Bisi mega orang ke di beri basa dilumbung nya laban ketegal iya ketuai mungkal menua tauka sida ke udah pegari nama tampak rita ba siti-siti pengawa ti kala digaga sida iya rambau sida agi idup menya.

“nyadi tuju kiitai Iban kelia meri basa ngelumbung aki ini ke patut dilumbung tu, ngichaka semengat sida ke udah nadai nya agi ulih ngemata ka bala uchu ambu sida ke agi idup nguan menoa,”

Dalam pengarap lama orang tuai kelia, iya nya baka enggi bansa kitai Iban empu ngambi ke banding munyi ke udah disebut dulu tadi, iya nya ngelumbung orang ke parai, udah bulih sukung ari siku intelektual bansa Jipun penama Motomitsu Uchibori dalam siti thesis Doctorate of Philosophy (PhD) iya The Leaving of This Transient World: A Study of Iban Eschatology and Mortuary Practices (1978).

Siko ari bansa Jipun ti benama Uchibori madahka pengawa bebasaka orang mati ngena jalai lumbung tu nya siti jalai ngemesaika pengingat enggau guna orang ke udah nadai, udah lesi bebadi laya sulai ,ninggal ke kaban belayan tanah perimba ia ke agi idup nguan menoa alai tu.

Ngena jalai pengawa kitai ke belumbung tu,kitai mensia ke agi idup tu, ke udah ditinggalka orang ti parai nya sigi ngichaka semengat orang ke parai nya agi ulih tinggal lama begulai sejalai sama enggau sida dalam semoa pengawa, enti ulih selama-lama iya dikarap ke bansa kitai iban.

Laban lumbung nya alai kitai ngubur tauka alai kitai nyimpan bangkai orang ke udah parai, kitai ke agi idup tu agi ulih ngingat sereta begulai enggau sida lebih ari sida ke udah ditumbak ba dalam tanah di pendam lalu diau di Sebayan, pia ku penerang ari Uchibori.

Mati dilumbung taka belumbung tu ngering sereta balat agi nyaguka peninggi penuduk kitai lelaki ba dunya kitai Iban. Reti nya, semina lelaki aja ke dilumbung.

Dalam reti jako ke bukai, lumbung tu semina ungkup lelaki aja. Lalu lelaki ke mati sereta diberi basa dilumbung nya ukai mega sebarang lelaki seneka ati kitai ke ngasuh tauke minta, tang basa parai dilumbung tu semina diberi ngagai lelaki ke udah pegari nama nyadi pungka laki udah bedengah tauka sida udah nyadi tuai orang mungkal, berimba menua, lalu matak orang mayuh pindah mungkal menua baru.

Lalu pia mega sida ke udah nyadi tuai megai menua, ngempung nembiak redak mayuh pan tau mega diberi basa belumbung enti sida udah parai jemah ila.

Nyadi bangkai orang ke dilumbung nya enda ditumbak ke dalam tanah, lalu digagaka langkau mit. Dalam langkau nya sentubung tauka jako bukai lungun semina ditemparaka (begantung ari tanah) lalu disuling, ngambika bisi jalai isi enggau beru buut nya anyut ke dalam tanah.

Lumbung tu bisi digaga ke kitai iban bedinding lalu bisi mega atap enggaika sentubung ke dengkah dalam langkau nya basah tinggang ujan. Nyau udah lama, iya nya nyau udah betaun-betaun sentubung nya udah diteju ke dalam langkau, nya baru orang ngambi tulang orang ke dilumbung nya lalu nyimpan tulang nya dalam tajau tang tajau nya agi mengkang mega disimpan dalam langkau nya nyentuk ke selama lama iya. Reti nya tadi tulang orang ke udah parai dilumbung nya nadai dipindah ari langkau nya.

Tang siti ari lumbung kitai iban lumbung ke endang pegari nama tampak rita,iya nya lumbung enggi niang Rentap (Libau batang nama) ke digaga baru dalam taun 1989 suba.

Lumbung Rentap nya nyadi tanda pengingat perintah Barisan Nasional Menua Sarawak ba Tuchung Bukit Sibau di Ulu Wak, Pakan dalam sitak Sarikei.lumbung nya digaga baru,dipindah ke ari langkau asal lumbung niang Rentap tu. Alai lumbung asal nya endang besendi dia begulai tanah enggau nalan baru.

Lumbung niang Rentap nya mega diberi nama baru, iya nya ngena nama Lumbung Pahlawan Rentap ke digaga ngena nama stail jako kitai kemaya ari tu. Iya batapka teras sereta bedindingka kayu tesap ke meri mayuh awak jalai angin masuk ke dalam. Nyadi rarung dalam nyin digaga ari semin duduk ba tiang teras begantung ari pelasar semin ke chukup tegap.

Asal iya menya Rentap sigi dilumbung, lalu perengka tulang enggau keruntuk pala iya disimpan dalam tajau. Semua utai nya diatu udah dengkah dalam rarung udah bekau lumbung ke digaga baru dalam taun 1989 tu suba.

Leka jaku ke ke bisi ditulis ba atas Batu Pengingat Rentap di Bukit Sibau, Ulu Wak, Pakan, Sarikei munyi tu ia,ngambi ke kitai sama sama nemu: ‘Di baruh Batu tu gali-galai sadai tulang niang Raja Berani Iban penama Libau digelar Panggau Dara, Rentap Tanah Kudi Menua.’

Raja berani kitai iban ke benama Libau ke dikelala agi enggau gela iya Rentap suah mega ngetanka menua ngelaban sereta nyakang serang bala Perintah Raja Brooke rambau musim nya kelia.

Endur iya pegari belaban enggau bala Rajah di Bukit Sadok, urung 44 kilometer 141 degree muak ke tenggara ari Bukit Sibau kena pegai sitak Betong jam kediatu.

Penatai asal Rentap tu ari Skrang menya. Lebuh agi biak menya, Rentap suah nitihka tuai Iban ari OKP Dana ‘Bayang’ belayar lalu ngerampas perapasan ba tasik, lalu tedirika nama nyadi tuai serang Batang Skrang.

Lalu lebuh maya James Brooke nyadi Rajah dalam bulan September 1841, sida bala ke datai ari Skrang enggau Saribas ke berani nya dikumbai iya penyamun tasik tauka lanun.

Rentap terubah betempuh belaban serang enggau bala Brooke di Kerangan Peris di Batang Skrang dalam bulan Ogos taun 1844.

Ba pun taun 1853, Rentap enggau bala iya ngalahka Rajah Brooke di Lintang Batang muak ari ulu Nanga Skrang ditu alai menantu Rentap mansutka pemerani diri lalu bedengah ka siku pemesai perintah Brooke, Allan Lee.

Dalam taun 1854, James Brooke mai 7,000 iku bala kitai Iban bechampur enggau bansa Melayu ngalahka Rentap di Sungai Lang. Ari nya Rentap engggau bala iya nyurutka diri ngagai tuchung Bukit Sadok.

Kuta tegap ti tampak tebilang rita enggi Rentap ba Bukit Sadok diserang bala Rajah tiga kali, iya nya dalam taun 1857, 1858 enggau taun 1861.

Ba serang ke penudi iya sida belaban enggau Rentap diuluka rajah kedua, Rajah Charles Brooke, dia rajah nya ngelumu ke naka pemayuh bala ngelaban Rentap. Sida belaban enggau pangan diri balat amat sekali tu, ke lalu ngujungka kuta Rentap rubuh laban bala rajah nya ke ngemai meriam Bujang Timpang Berang kena nyelinting kuta niang Rentap rambau maya nya kelia.

Rentap ulih di alah ke sida ia rambau perang nya kelia, tang niang Rentap tu menya enda kala madah diri nunduk. Iya mai sekeda bala iya nyurutka diri ngagai Bukit Lanjak, udah nya rarat ke Entabai pati Kanowit lalu ngentapka diri di Sungai Wak dalam Julau. Dia iya parai tuai urung taun 1870 tauka dudi mimit ari nya.

Maya ke ngelumbung iya baru kena 28 Oktober 1989 suba, mayuh bala kaban peturun Rentap sereta bala tuai Iban enggau pupu raban bansa bukai,lalu pia mega bala pengabang mayuh sama bisi datai ngulu pengerami ba Bukit Sibau, Pakan dalam sitak Sarikei.

Pengerami Lumbung Pengingat Rentap tu dipenyadika Sapit Kepala Menteri Datuk Amar (diatu Datuk Patinggi Tan Sri) Alfred Jabu Numpang ke rambau nya Menteri Betanam Betupi enggau Pemansang Raban Bansa.

“Kitai mega minta Petara iya nulung nyukung kitai ke agi idup lebih agi uchu-ambu iya awakka gegela ‘Libau Panggau Dara, Rentap Tanah Kudi Menua’ sigi selalu lepung-lepung baka payung bulan nyintung tanggar pernama,” ku jaku kenang bekau Sekiteri Menua Sarawak niang Tan Sri Gerunsin Lembat lebuh bejadi Lumbung Rentap menya (maya nya iya nyadi Ketuai Majlis Adat Istiadat).

Amat meh pengawa ngelumbung tu nadai agi dikereja kitai Iban rebak kemaya haritu, tang kitai enda tau enda nemu mimit pasal adat asal belumbung enggai ka nadai nampung jerita siti pengawa lama pengawa asal kitai Iban ngagai nembiak rebak baru jemah ila. Tu awak ke kitai sama bejalai betungkat ka adat, tinduk bepanggalka pengingat. Anang ngelengka ke ngapa adat enggau main asal kitai iban nyentuk ke jemah ila.






BESI