Bidik lansik, kaya raja laban bisi ngembuan batu pending

ANAK AKU SOPHIA SIMBA ENGGAU ERNEST VINSON BANYAN





Nitih ka jerita sida ke tuai menya,pengaya,pengelantang enggau penyenang Megung kelia ketegal iyaka bisi ngembuan batu pending,lalu ngunjung ka iya ulih ninga alai manuk belalai ka reta pengaya sida.

Tang ketebal agi bansa kitai Iban kelalu deka ngenemuka diri, lalu bisi mega sekeda iya semadi ditibarka rangki baru muka mulut, laban kelalu lembau, kelalu ngemaruhka diri. Taja pia bisi mega sekeda ka endang enda mudah angkat ngapa, enda mudah engkebut enti ukai ketegalka rarika munsuh. Tu siti ari banding ke bisi dalam gaya jerita entudi tu.

Nyadi maya nya kelia bisi deh kitai bansa Iban ke penama iya Megung. Iya bebini lalu ngambi indu siku ke penama iya Sindung. Bini iya Sindung tu anak Tuai Rumah Ambung.

Nitih ka jerita bendar amat Tuai Rumah Ambung nagang anak iya Sindung enda ngasuh jadi enggau Megung rambau nya suba, laban ka meda pendiau Megung tu bangat seranta nadai utai kemisi,sebuti ka bisi makai aja.

Taja pan baka nya, seduai iya keran bendar deka jadi enggau pangan diri . sepengudah seduai iya ka jadi melaki bini nya tadi, seduai iya lalu diau kediri. Rumah seduai digaga ka Megung nya betiang betungkatka buluh, bedindingka gari tikai, lalu beatapka kulit kayu. Sinu bendar ga meda gaya pendiau pengidup seduai iya ke jadi melaki bini idup ngati Kediri nya ke nadai tentu menukunya.

Udah ga alai endur diau seduai ga jai serta enda menyana,tambahka agi enggau penyeranta seduai dalam pengidup. Deka makai pan nadai ga asi, deka ngirup nadai ga ai, deka berapi nadai ga kayu. Suah bendar ga seduai ke lapar nadai utai dempa. Orang bukai enggai meri seduai laban meda Megung tu ngelusu endar, enggai kiruh enggau orang bumai. Ni bisi utai dempa enti enda bumai.

Taja pan aki kitai Megung tu ngelusu,tang Megung tu landik amat begagaka bubu. Genap hari iya semampai majakka diri begagaka bubu. Mayuh bengkah pemesai bubu ke digaga iya, Tang ke endang nyengala udah tembu lalu ulih ditan ba sungai nya bisi tujuh iti. Bubu iya tujuh iti nya chukup tegap, sereta manah endar digaga iya. Baka ke ukai utai digaga orang ngelusu.

Nya alai bubu tujuh bengkah nya meh ke dianjung lalu ditan ke iya ba sungai enggau bisi mega ba batang ai besai. Alai ka disadangka Megung ulih bulih ikan.

Ari siti nurun meh Megung tu ngabas bubu iya. Peda iya tak nadai utai enda ngemayuh nya ikan ka ulih bubu iya. Lebuh iya datai di rumah gaga endar meh tudah Sindung meda pemayuh ikan ulih bubu laki iya Megung. Nyau bebesai besai, ikan ke dibai pulai . Bala sida semah, sida mengalan, sida empurau, sida tengadak. Seduai melaki bini lantang endar nyawa laban selalu bisi ikan ka lauk.

Genap hari, genap pagi baka selama meh semua bubu Megung tujuh bengkah nya semampai bulih ikan magang. Udah bekau ka Tujuh hari bejurut Megung udah seruran bulih ikan. Diak deh genap ari ke lapan Megung tub aka selama meh deka nurun ngabas bubu iya.

Tak enda mukai mukai. Datai iya ba tampun bubu ka ditan ka iya nya, dia iya meda ular sawa enggau ular belalang benung betunang, bebelit ka pangan diri. Ular sawa nya indu, lalu ular belalang nya lelaki.

Belalang seduai Sawa sama betemu enggau pangan diri ba ulu sungai nya, alai Megung ke selalu ngenanka bubu iya. Seduai nya bisi leman enggau pangan diri. Diak deh tudah Megung tu tadi lalu netak iku Sawa nya, lalu dibai iya pulai ke rumah sereta diselitka iya ba lalau tangga.

Ari maya iyaka datai di rumah,benung naka pemangat iya ujan. Tudah Megung tu nyau gegetar laban kachelap pulai ngabas bubu. Iya lalu bekindu ba dapur di bilik.

Benung seduai melaki bini ke ngintu diri tengah hari nya,diak deh datai temuai tiga iku. Semua bala temuai tiga iku nya sigat magang gamal. Sida nampak berupai endar sama kering gamal, meda ari gaya gumpal isi. Jejabung ilang sida tiga pan sama panjai nyau nipas tengah laman Megung seduai bini iya Sindung.

Meda penatai sida tiga, Sindung seduai Megung lalu ngasuh sida tiga nya sama ngenudukka diri. Sindung pan lalu ngenahka sida tiga nya makai, laban ke endang bisi lauk ikan, nadai malu meh tudah tuai ngenahka bala temuai tiga iku nya makai.

Makai meh sida tiga, nadai utai enda ngenyang-ngenyang nya. Nyau berupai nyegang buah lemba sida tiga sebuat empa pengenyang makai enggau seduai melaki bini. Ni enda kenyang laban belaukka ikan ka ulih bubu Megung. Sindung seduai laki iya pan gaga bendar ati nyepi seduai sama kenyang. Ka tambah mega gaga meda orang tiga iku nya ka bisi datai ngundang deka dibai seduai merarau enggau seduai iya melaki bini. Nadai kala udah orang bukai makai ba bilik seduai kelimpah ari sida tiga iku nya tadi.

Udah sida badu makai, temuai tiga iku nya lalu madahka pejalai sida tiga nya deka ngambi Megung laban deka minta iya ngaduka laya bala nembiak ba rumah sida.

“Aku tu enda kala ngintu laya unggal, enda nemu adat enggau basa dikena ngintu laya,” ku Megung. “Entua aku baru nemu adat, tau ngintu laya orang. “Kami enggai mai entua nuan, kami deka beguna ka penemu nuan tu Megung,” ku temuai tiga iku nya. “Nuan enda tau enda enggau kami, laban nuan aja ke diguna kami penemu ngintu laya tu.”

Udah nya sida tiga nya lalu nanya Megung baru.

“Kati nuan bisi meda orang betunang tadi? Kati nuan bisi meda seduai ngaga leman enggau pangan diri? Udah nya nuan lalu mai buok indu nya pulai lalu diselitka nuan ba lalau tangga.” ku siku ari sida temuai tiga iku nya nyaut megung.

“Amat nya deh. Amat bisi aku meda orang dua iku ngaga leman tadi,” pia ku Megung. Iya lalu nurun nitih temuai tiga iku nya. Lebuh baru datai ba tengah laman rumah iya, sida tiga nya lalu ngasuh Megung ngetu sereta mejamka mata iya. Pejamka iya mata meh nitihka padah sida temuai tiga ikunya. Enda lama udah iya ke pejam, siku ari sida nya tadi lalu ngasuh iya enchelak baru. Peda iya nyau nyelaie gaya menua ke alai iya bediri, ukai tengah laman iya agi tang nyau ba tengah laman rumah panjai orang bukai ke chukup panjai sereta manah. Nyau rapas peda ujung setak sepiak ari ulu nyin empa pemanjai rumah orang nya.

Lemai nya udah badu bebela makai, Megung lalu ngintu laya orang nya. Nadai lama iya mutuska pechara orang nya, laban iya amat bisi meda seduai dua iku ke ngaga leman enggau pangan diri. Ka tambah nya mega,laban iya ka bisi ngemai buok – iku ular sawa ke ditetak iyanya suba –lalu nya diambi ka kelaie seduai amat kala bisi beleman enggau pangan diri.

Orang deka meri iya tajau setawak enggau mayuh macham utai bukai ke berega ambi ka upah iya ke ngadu ka laya sida nya tadi. Tang Megung enggai nyambut semua utai nya, laban iya keran deka minta rengka siti ke dikumbai urang batu pending. Ninga bakanya, orang nadai kakang, lalu terus ngenjukka batu pending nya ka upah iya. Batu pending nya lalu deka dibai iya pulai, simpan iya dalam raga iya.

Tang sebedau iya ngejangka menua nya, orang dia lalu madah ngagai Megung: “Laban nuan udah bulih batu pending, nya alai nuan tau ninga semua utai ke enda ulih didinga mensia bukai.”

Udah bekau nya, semua orang ke diau dalam rumah panjai nya lalu dipeda iya bebali nyadi ular, mina sida tiga ke ngambi iya ngatur laya nya aja ke agi mengkang nyadi mensia.

Ku siku ari sida tiga, “Nyadi kami tu bunsu ular. Batu pending nya kena kami ular ninga jaku anak mensia ke bisi puni. Kami ulih ninga jaku anak mensia ke puni lalu bisi mega sekeda ke puni nya dipantuk kami.”

Megung nyau tegenung ninga jaku sida nya tadi. Sida tiga lalu ngasuh iya mejamka mata iya baru anang engkebut. Enda lama iya mejamka mata, lalu enchelak sereta nemu diri bediri ba tengah laman rumah iya empu, alai iya ke keterubah diasuh sida tiga nya pejam hari sebedau nya.

Laban ke ngembuan batu pending nya Megung ulih ninga jaku semua utai, baka jaku empeliau, tau ninga randau bala sida tichak, jaku jelu bukai ke berandau enggau diri sama diri.

Nyadi sekali Megung ninga manuk berandau ka pasal utai lama ke disimpan bala aki ini sida kelia. Manuk lalu terebai ngagai pulau babas mali. Megung tu nengkilaka manuk nya tadi. Dia iya meda manuk ngeranjai ba tanah. Lebuh manuk ngeranjai, dia peda iya pansut setawak, bebendai, tajau enggau mayuh macham utai bukai ti berega ari tanah dikeranjai manuk nya. Udah nya manuk nya lalu pulai ninggalka utai nya dia.

Meda bakanya, Megung lalu mansang ngambi setawak, ngambi bebendai, tajau enggau semua utai ke pansut ari tanah kair manuk nya tadi.

Nama agi deh, lalu kaya raja meh Megung seduai bini iya labanka bisi rengka tengkira ke berega nya tadi. Seduai lantang bendar ati meda semua utai nya betugung ba bilik seduai.

Bala orang bukai ke meda nya, mayuh ngumbai seduai ngenchuri. Tang dini seduai bisi ngenchuri, laban semua nya endang utai diberi Petara ke sinu meda seduai balat merinsa, balat seranta.

Tegal seduai nadai jai, nadai beduan orang, Megung seduai Sindung dikesinuka Petara, lalu udah nya lantang diau bepegai ba adat, ba tungkat, lurus nguan menua.

Entua iya Tuai Rumah Ambong pan balat nesal laban udah muru anak iya Sindung seduai Megung dulu suba mula seduai jadi ari bilik sida. Diatu iya bebendar amat deka ngaul Megung seduai Sindung baru, laban meda seduai nyau kaya raja. Endang sigi baka ulah kitai mensia. Sigi belandik amat ka pengaya enggau pengeraja begulai enggau pangan diri.

Beduruk ari ensera Megung seduai bini iya Sindung tu meh bansa kitai Iban bulih leka jaku: “Baka ke bisi batu pending, lansik ninga.”








BESI

Asal kitai Iban nemu beburung

SEKEDA ARI BALA KITAI IBAN KE BISI GAWA DI KELANTAN



Penemu beburung tu datai ari ajar Sengalang Burung ngagai uchu iya Sera Gunting

Asal kitai Iban nemu beburung nya bepun ari ajar Aki Lang Sengalang Burung, Aki Jugu Menaul Tuntung ngagai uchu iya Sera Gunting, anak Dara Tinchin Temaga seduai Menggin (Sebedau begulai enggau Menggin, Dara Tinchin Temaga, iya nya anak tuai Sengalang Burung udah belaki ka Ketupung.)

Sengalang Burung madah ngagai uchu iya Sera Gunting semua utai dikereja mensia deka bechuanka padah enggau munyi burung tujuh iku – Ketupung, Beragai, Embuas, Bejampung, Pangkas, Kelabu Papau Nyenabung enggau Kunding Burung Malam – ke nyadi menantu iya (Sengalang Burung).

“Semua bala aya nuan, menantu aku tujuh iku nya nyadi ka pengari aku lalu ngenataika pesan enggau padah aku ngagai anak mensia,” pia ku aki iya madah ngagai Sera Gunting.

Ninga bakanya, Sera Gunting lalu nanya sekalika nyawa burung Empulu, Empitu, Engkerasak enggau Kunchit tau ambi ka burung. Aki iya madah nyawa sida nya enda tau ambi ka burung laban sida nya ulun iya magang.

“Semina nyawa bala menantu aku aja ti tau ambi ka burung. Nyawa Nendak, ke berumah numpang ba ujung tanju bala menantu aku tau ambi ka burung enti burung Nendak bisi dipeda terebai meraka jalai ari mua orang ke bejalai, enda kira ari kiba tauka ari kanan. Tang nyawa iya semina tau ambi ka burung enti bisi munyi burung bukai udah didinga dulu ari nya,” ku aki iya.

Udah nya Sengalang Burung lalu ngajar Sera Gunting nama reti munyi burung lebuh baru deka belabuh bumai, bepun ari nurun manggul. Nyadi ku iya, enti ba serantu jalai nurun manggul kitai bisi ninga Ketupung, anang enda mabak anak kayu ambi ka tambak burung. Lalu enti apin lama udah nya lalu bisi ninga Beragai, nya burung ti manah madahka bulih padi.

Enti bisi mai tambak burung udah bekau ninga Bejampung, lalu apin lama udah bekau nya bisi ninga nyawa Embuas, nya mega siti burung manah madahka orang nya bulih padi ba taun nya. Nya dikumbai burung Buruk Penyedai, reti nya orang nya deka ngaga tiang rumah endur engkah padi nya lentur deka patah ketegal pemerat padi ti mayuh ulih sida.

Nyadi enti orang nya bisi mai tambak burung udah bekau ninga nyawa Embuas lalu apin lama udah nya bisi ninga Bejampung, nya pan burung ti manah dikumbai Pesuk Bandir, reti nya reban deka angus lalu api makai bandir. Kebuah manah umai angus awakka tanah endur nanam padi nya ami, lalu iya deka tumbuh galak.

Enti orang nya ba serantau jalai ke umai bisi mai tambak burung udah bekau ninga Ketupung lalu enda lama udah nya ninga Bejampung, nya burung pengabis jai. Nya sumpah ari iya empu (Sengalang Burung) awakka anak mensia ninga orang sebilik nya makai asi pana (asi orang ngulit) udah bekau siku ari sida sebilik nya parai ba taun nya.

Enti nyawa Bejampung didinga ba serantau jalai deka manggul, lalu udah nya ninga Ketupung, nya siti burung enda manah dikumbai Burung Beperai. Reti nya burung nya ngayuka dukun deka nunu kemenyan lebuh ngubat siku ari sida sebilik nya sakit ba taun nya.

Lalu enti nyawa Beragai bemunyi dulu ba rantau jalai ke umai, lalu udah bekau nya ninga nyawa Bejampung, tu mega siti burung jai ke ngayuka pua kumbu digantung ambi ka sapat orang rabat ba ruai sida nya. Reti nya siku ari sida sebilik nya deka nyau (parai) dalam taun nya.

Nyadi enti bisi mai tambak burung udah bekau ninga Embuas, lalu udah nya ninga Pangkas, nya pan siti burung ti jai. Nya pan madahka siku ari sida sebilik nya deka parai ba taun nya. Lalu enti bisi ninga Beragai, udah bekau nya lalu bisi ninga nyawa Kelabu Papau Nyenabung, burung tu ngayu ka ai mata ari sabak sinu ketegal siku ari sida sebilik parai dalam taun nya.

Tang enti ninga nyawa Beragai ba rantau jalai ke umai, lalu udah nya ninga Ketupung, nya siti burung manah. Iya ngayu ka tali ma kena mai padi baka lanji, sintung enggau selabit selalu deka ditukar laban selalu kena mai padi ti mayuh sereta berat.

Kena iya ngujungka ajar iya ba renggat nya, Sengalang Burung madahka udah lepas tujuh bekau manggul, lebuh maya nebas, enti ninga nyawa Kelabu Papau Nyenabung, nya burung ti manah. Iya nyadi ka pengelindung tauka pengerabun umai awakka enda kena peda bala jelu jai enggau semua utai ke ngachau umai enggau penumbuh padi.

Nyadi diatu kitai sama nguji nyenguk enggau silik agi siti atur pengawa beduduk ari penemu pasal beburung nitihka ajar Sengalang Burung ngagai uchu iya Sera Gunting nya tadi, iya nya atur pengawa ke dikumbai Gawai Burung.

Dijangka ke aku mayuh bala kitai diatu enda tentu nemu nama utai ke dikumbai urang Gawai Burung. Kebuah pia laban pengawa tu jarang dikereja kitai kemaya ari diatu, ketegal mayuh bala kitai Iban udah muai pengarap lama. Tang kitai anang semina ninga nama gawai nya aja, lalu enda nemu reti iya. Enda salah enti kitai nyidi tauka betanya ngagai urang ke tuai ka nemu senentang pangawa tu. Sayau kitai bansa iban tu enda nemu reti pengawa asal bansa kitai empu.
Nyadi lebuh orang tuai menya nirika Gawai Burung, utai nya dikereja sida betangkan-tangkan, laban sida nampung gawai apai indai sereta mega bala aki ini sida ke enda tau enda orang ke pugu menua, lalu bisi mega ngembuan tampun enggau tusuk. ( bisi ngembuan pala dengah aki ini sida.)

Bala orang bukai ke ukai nampung apai indai aki ini sida, tang bisi mimpi lalu diasuh antu begawai, tau begawai Sandau Hari, tauka niri Gawai Mata. Bisi siku dua orang tuai kelia diasuh antu dua kali ke tanju tegal iya sakit. Nyadi sida nya niri mega gawai tang tiang kalingkang sida ari munti, laban nya ukai niri ka Gawai Burung nampung gawai bala apai indai iya.

Enti orang deka niri ka Gawai Burung beserak enggau gawai bukai baka Gawai Batu, Gawai Tajau tauka Gawai Antu, Gawai Burung enda tau sekali-kali dipenyadika dudi ari gawai bukai. Lalu pia mega enti gawai bukai ke ukai Gawai Burung beserak enggau Gawai Antu, iya enda tau enda dulu dipenyadi ari Gawai Antu, enggai ka tuak gawai kena keregau Indai Bilai (lalu jadi masam tauka jai).

Orang tuai menya mega bisi ga didinga kitai ngenang pasal orang ke begawai kelia nambahka pala sigi ke nurun ari tampun tuai gawai. Enti bakanya, pala sigi ari siti-siti tampun bukai dalam rumah nya enda tau enda sama diturunka mega. Lalu semua bilik orang ke ngembuan tampun ba rumah nya enda tau enda munuh siku babi sepintu ambika dipeda atau iya. Nyadi babi ke dibunuh kena niri ke tiang gawai nya dikumbai babi sengajap, lalu enda ibuh dipeda atau.

Pengawa ke nyendiaka gawai nya mayuh amat leman enggau pengawa, belabuh ari sida indu ke nutuk beras ka pun beram (kena ngaga tuak). Alai pengepun sida ke nutuk nya ba ruai orang ke nirika gawai nya ba pugu tanju laban dia meh alai endur orang duduk nasak enggau endur penuduk Sengalang Burung enti iya datai ngabang. Bala indu bukai ulih nutuk ba endur selama.

Udah nya mayuh mega utai dikereja orang serumah nya kena nyendia ka diri deka begawai. Sida deka begagaka raran kena ngelulun asi, lalu bisi mega ngaga pantar ai. Kedua-dua iti utai nya enda tau enda digaga ngalih ari ulu pendai. Maya pengawa nya, orang di rumah pan lalu begendang kena ngerami diri.

Udah tembu pengawa begagaka tuak, orang ke empu gawai lalu berundingka utai ambi ka lauk. Dulu kelia lebuh nengkira lauk kena begawai, sida deka begerah nubai enggau ngasu tang nyau dudi tu agi sida baum meli kerebau, chapi enggau babi sereta manuk.

Sida mega dulu nyendiaka perengka enggau utai ambi ka piring. Orang ke begawai nya lalu turun begiga ka utai babas ambi ka perengka piring baka buah pisang jait, buah engkudu, daun enggau upa lengki, buah enggau upa banjang, upa batak, bunga tanam ba umai baka bunga buot enggau bunga tepus. Nyadi enti bisi salai ikan, salai gerama enggau salai bukai, semina salai ikan sebayan baka keli enggau belau enda diguna laban dua bengkah salai nya untung Indai Bilai.

Udah perengka piring ari babas ulih magang, nya baru sida ke indu belabuh nyendia ka leman piring ke tau bari baka asi pulut, penganan iri, ketupat, sungkui, telu, letup enggau sagun. Enti semua utai nya udah sedia, nya baru tuai gawai baum ngatur orang ngambi ngabang. Menya rumah panjai mayuh jauh pejalai ari sebuah-sebuah taja pan bisi mega ke enda bangat jauh. Kenu ku jerita tuai, orang ngambi ngabang nya ngena temuku tali ke enda tau enda dibuka tiap hari sampai abis. Nyadi diatu, menua nyau semak agi laban udah jauh maju lalu orang bepadah pan ngena surat tauka bepesan ba radio.

Pengawa ke terubah dikereja orang ngepunka gawai nya Nimang Pantar , nya malam kejang hari pengabang datai. Pantar nya digaga pagi nya udah bekau tuai gawai begerah ngasuh orang ngaga pantar. Nyadi lebuh ke ngaga pantar nya gendang rayah dipangkung tiga renggat.

Pantar nya digaga ba antara ruai enggau tempuan lalu digaga seretai sekayu rumah nya, taja pan orang bukai enda tau enda nganti tuai gawai belabuh ngaga dulu. Udah nya baru manuk dibiau kena begerah bepadahka sida serumah belabuh nganchau tikai nyendiaka nimang pantar.

Sepengudah beranchau tikai, lalu dua iku ari sida serumah di asuh ngirit chapan siti siku ke setak ili, siku ke setak ulu, mupu ka Antu Rua. Utai ke diberi ari sepintu-sepintu bilik nya mayuh macham utai ke udah jai, enda diguna agi baka gari genuk, gari periuk, gari sepit, enggau utai bukai.

Sereta udah tembu mupu nya baru rumah nyambut orang ke diasuh nasak, iya nya miring ka Gawai Burung. sida tu udah disambut di tanah, dialu enggau gendang. Datai orang ke ngalu iyaka ba tanah, sida lalu nanya ka burung iya. Enti bisi burung orang lalu ngadu ka ai burung, enti nadai orang ngaga ai untung iya dikumbai ai dua ratus dipedua iya enggau tuai gawai. Reti seratus nya sepuluh iti gelas penuh disi ai tuak.

Udah abis pengawa ngaluka iyanya tadi di tanah nya baru mai iya niki lalu dialuka sekali agi enggau chukup basa ba ruai tuai gawai. Iya mega diuntung mayuh macham ai tiki bepun enggau ai basu.

Lalu udah tembu niki orang nasak nya baru ngalu penatai bala lemambang. Enti bisi burung, orang lalu ngatur bela burung nya nyengkaum ngasuh sida bejalai niti lesung tujuh iti ba tempuan, sema ka sida bisi kena pimpin burung bisa. Sida lalu dialu bejalai niti ruai, dienjuk ngirup.

Nyau baruh hari baru orang nasak ngetas sigi antu pala ari siti tampun tang enti siti aja tampun ba rumah nya, iya deka ngetas tiga igi. Apin ngetas antu pala iya deka kena biau dulu enggau manuk. Udah nya ila lalu manjung panjai tiga telian. Pala ke udah diketas nya lalu di engkahka ba chapan, lalu di pangkangka enggau piring.

Orang nasak nya tadi lalu nurun ka kenyalang lama (kayu) ari sadau, enti bisi. Enti antu pala enggau kenyalang sama udah datai, setunggul mansau dua iti lalu digantung ba tulang perabung ba setak-setak.

Tuai gawai pan lalu miau ka bala mayuh ngena manok sereta lalu begerah miring. Keterubah iya, sida ngaga piring ka pandung besai ba ruai tuai gawai. Sida miring ba pugu tanju. Udah badu miring dia baru sida ngaga piring ka tiap iti pandung mit pemanjai rumah nya.

Udah badu makai lemai nya baru tuai gawai miau ka manuk baru kena ngerandang jalai. Dia orang ke nasak nya berayah niti ruai, berandang jalai. Lebuh nya orang begendang rayah panjai, datai ka randang nya tembu.

Enda lama udah nya lemambang lalu belabuh mengap. Nyadi pengap sida numbas pemanjai laban iya ditampung baru lebuh malam gawai nyadi. Kelimpah ari mengap, nadai batang pengawa ke benama. Tang sida selalu deka ngerami rumah enggau begendang panjai ke alai orang ngajat, bepencha, bekuntau, main chekak enggau main bukai.

Ba bala rebak ka dudi diatu, pengerami Gawai Burung tu amat jarang endar bisi diatur, tang enti nyema bisi pengerami tu, bala nembiak dipelabaka gagit agi deka mantai ke pengerami baru nyengkaum belagu karaoke, main band tauka poco-poco enggau sekeda pengerami bebuti betundi ke bukai enti pengerami begawai nya udah tembu diatur.







BESI

Tenun iban dikelandik ka mayuh bansa ba dunya tu

EX TR BANYAN ANAK BESI ENGGAU BINI IYA SEBI ANAK IGANG


NYADI DIBARUH TU SEKEDA ARI RENGKA TI DIKENA BETENUN






Siti tanda pengelala sereta pengelandik bansa kitai ke jarang amat bisi banding dalam dunya tu,pengawa kitai bansa ke betenun.

Ari pemayuh pengelandik main asal kitai Iban, pengawa betenun meh ke sigi endang dikelandikka bala orang ke dulu menya, kelebih agi ba bala raban indu kitai iban.

Mayuh bala urang ke landik dalam senentang pengawa enggau bala pakar ‘seni halus’ madahka kelimpah ari curak tenun nya nyadi ke tanda pengelala kitai Iban, pengelandik kitai betenun mega tusah amat kitai ngiga banding iya, enggau pengawa bansa bukai ke bisi ba dunya tu. Nya meh kebuah temuai ari menua tasik bela madahka tenun kitai Iban meh siti ari tenun ke chukup unik ke bisi ditemu di dunya tu.

Keba nya meh kebuah indu ke landik betenun nya meh endang sigi indu ke diangkunka orang lelaki kelia, sereta balat dibasa sereta engkadah bala sida ke indu sama indu, ambika chunto, ambika teladan bala indu ka bukai.

Nya meh kebuah kenyau ari maya sida Keling di Panggau Libau enggau sida Kumang di Gelung dulu menya, pengawa betenun nya endang di ambika takar pengelandik bala sida ke indu. Keba di Panggau Libau enti nitih ke leka jaku dalam ensera sida ke tuai,Indai Abang enggau Indai Keling meh endang ketuai matak jalai bala indu dalam pengawa betenun tu.

Lalu di Gelung, Kumang seduai Lulung ke belajar betenun ari indai seduai empu sereta mega ari Indai Abang di Panggau Libau, endang nyadi ka tuai,ka chunto,ka teladan bala indu bukai dalam pengawa betenun.

Bala raban indu kitai iban kelia endang sigi balat angkun ke pengawa nya, semua bala raban indu kitai bansa balat amat ngemeranka pengawa betenun kelimpah ari pengawaka bukai. Keba enti indu enda nemu betenun, sida deka diambika ketawa sereta semampai ba ujung mulut bala sida iya ke indu sama indu rambau maya nya kelia. Nya alai tegal nya, jarang bendar bala indu maya nya enda nemu betenun bekebat ka bala puak kumbu enggau ngepan ke bukai.

Rambau rebak kitai ke jauh udah mansang nitih ke singkang pemansang dunya kemaya aritu tu, bala raban indu kitai iban kemaya aritu udah jauh bendar kurang ba pengelandik enggau ngemeranka pengawa nya, laban mayuh agi bala nembiak kitai bansa diatu endang nadai awak belajar betenun,lalu lebih agi ngemeran ka pengawa bukai ke moden agi ko sida iya.

Anangka betenun, utai ke nama tarum enggau rengka bukai kena betenun pan sida enda nemu, laban endang enda kala belajar, sereta nadai awak bulih penemu nya.Nyangka pengawa nya udah "ketinggalan zaman" munyi ko jaku urang kemaya ari tu ba runding sida ia. Baka aku tajapan lelaki,tang nasib aku bisi manah mimit laban ke ampit meda pengawa ka baka nya,laban ke ini aku empu agi balat ngemeran ka pengawa nya nyentukka saritu. Bisi ga nemu utai ke menga mit rengka ke dikena begaga ke tenun kitai iban.

Kitai Iban rebak kediatu agi ga bisi ngemeranka pengawa betenun, taja pan udah jauh bendar kurang. Tebal agi pengawa tu agi dipejalaika sekeda raban ke bisi serakup diri empu.

Ambika banding, bala sida di Kampung Budaya ba Pantai Damai din endang bisi model rumah panjai Iban ke alai sekeda bala indu endang sigi digaji orang nenun pua enggau kain, kelimpah ari ke kena mandang ke pengawa pasal jalai betenun ngagai bala temuaika bisi nemuai raun ngagai menua kitai, kelebih agi bala sida ari menua tasik ke bisi datai kia.

Lalu ka tambah nya mega, laban endang sigi keran deka ngetanka pemanah adat sereta pengelandik asal kitai bansa Iban,
Bala sida ari Sarakup Indu Dayak Sarawak (SIDS) ba serata Menua tu mega semampai didinga bisi ngatur kelas betenun , ngicha ke rebak baru bisi nemu menga mit jalai betenun.
Lebih agi bala kain baju tenun enggau pua kumbu nya sebengkah ari adat asal kitai Iban ke udah majak lenyau selenyau ba jalai pengelandik enggau penau kitai ngaga iya.
Lalu arap ka mayuh nembiak kemaya ari tu berengkah belajar betenun, enggai ka penemu nya lenyau pia aja. Sayau enti pengawa asal raban bansa kitai iban ke dikemeran ka sida aki ini kelia lenyau piak aja dibai pemansang dunya. Sapa rugi,kitai bansa iban empu meh rugi jemah ila.

Laban tenun Iban nya udah nyadi siti tanda pengelala bansa kitai, nembiak diatu sigi patut ngemeranka iya, lalu ngichaka bansa kitai terus dikelala bansa bukai ari pengelandik betenun ka tambah mayuh bengkah adat enggau main asal kitai ke udah ngangkatka nama bansa kitai di serata dunya tu. Nadai ngasuh kitai rugi enti kitai agi ngemeran ke pengawa asal bansa kitai empu nyentuk ke jemah ila.




BESI

Penemu kitai kelia bepanggil begau minta sah

EX TR BANYAN ENGGAU MENYADI IYA PEMANCHA JANTAN


Terantang tawak kena kitai minta sah bala beguai maya tusah, temuku tali kena kitai bebai nurun ngayau

Sebedau kitai bansa iban ke bekena ka jalai tulis tauka bepanggil ngena surat, tuai kitai raban bansa Iban baka Pengulu enggau Tuai Rumah ke dulu menya endang sigi ngemeran ke ngena jalai asal kitai bansa kena bepanggil tauka bekangauka mensia mayuh mensia banyak, tauka bekangauka sekeda mensia datai ngulu pechara sereta mega pengawa bukai tauka maya minta bantu beguai ari bala mayuh lebuh bisi penusah ninggang rumah sida iya rambau maya nya kelia.

Sekalika iyanya maya ke bisi penusah angus rumah, bisi orang mati bebadi, kena pangka kilat, kena tambun tanah tusur, tabanka tanah runtuh, ampuh bah tauka kena serang kayau anak tauka minta sah laban kena alah laban bala munsuh enggau mayuh bengkah penusahka bukai ke bisi nuntung, orang tuai kelia endang bekangau tauka bepanggil ngena chara enggau jalai asal bansa kitai empu. Jalai nya enda bula nyelaie didinga ke kitai ke rebak baru kemaya ari diatu, tang iya cukup ngasi ba raban bansa kitai bansa Iban empu, laban nya meh chara enggau jalai ti endang dititih sereta dikemeranka aki ini kitai ari dulu kelia lalu nyentukka ke kemaya ari diatu, lalu adat nya sigi amat ngasi ba kitai bansa iban.

Dulu menya, enti tuai kayau tauka tuai serang deka bekangauka mensia mayuh awakka sama nurun ngayau sereta sebala, iya ngirumka temuku tali ari rumah iya lalu dibai ari endur siti ngagai endur siti. Nyadi sama ditanchang enggau temuku tali nya selambar bulu manuk enggau siti rangkang ke udah angus ditunu setengah.
Selambar bulu manuk nya ngemai reti, semua utai ke ditanchang sama dia enda tau enda dipejalaika ari rumah siti ngagai rumah siti enggau naka penyampat enggau pengelengkas iya.
Bulu manuk nya nyadi ka tanda tauka nyadi lambang iya mesti lempung sereta laju dipejalaika bala ti udah ditesau tuai nya tadi. Bakanya mega rangkang tauka kayu mit ti udah setengah angus ditunu nya ngayuka baka reti sempun ulih ambika tenggau lebuh bejalai malam. Reti nya semua perengka ke dikena bekangau minta tulung minta saup enggau minta sah nya enda tau enda mindah dipejalaika ari rumah siti ngagai rumah siti enda ngira ari siang malam tauka petang.
Semua utai nya endang enggau naka penyampat diasuh bejalai mindah ari rumah ke rumah ngichaka iya lengkas datai ba adan iya tauka orang ke dipadah sama enggau nurun ngayau nya tadi. Semua rengka enggau kelapung iya enda tau ngetu ngapa dipejalai ka enti sida bedau datai nuntung ba rumah ke batang d’ambi sama dibai enggau ngayau enggau mulau dulu menya.

Pesan ka bebai ke bala nurun ngayau nya mesti ditusui tauka dipadah enggau leka jaku. Barang sapa ke di asuh tuai ngenataika utai nya tadi enda tau enda nusui ngagai orang ke dituju kangau tauka panggil nya. Siti temuku ba tali nya baka ka mai reti berapa ari da timpuh utai ke di pesan nya tadi deka nyadi. Siti temuku nya ngemai reti sari.

Ninting pagi udah kerebak tawas siti temuku nya enda tau enda dibuka simpul iya sampaika iya abis. Ba senentang tu, lebuh pengabis temuku tali nya dibuka, semua bala anak pungka laki enggau bala manuk sabung ke deka nurun ngayau enda tau enda udah sama datai begelumu ba rumah tuai kayau ke ngirumka panggil nya tadi.

Nyadi kelimpah ari bakanya tadi, bisi sebengkah mega cara dikena sida ka nyadi tuai dulu menya, orang ke nyadi tuai kayau bisi mega udah kala bekena ka jalai nyelaie mimit ari nya tadi,utai ke di kena sida ke betesau ke bala anak pungka laki enggau bala manuk sabung iya ke chukup taluk sigi dikarap, awak ka sama nurun sereta ngayau ari rumah tuai sida. Jalai siti ke bisi udah dikena sekeda tuai kayau menya, iyanya bekena ke jalai bekirum ka sangkuh ke naka iya chukup penajam lalu dibalut ngena bulu buok munsuh.

Lebuh tanda panggil nya datai ba sebuah-sebuah rumah bala manuk sabung enggau bala pungka laki, orang ke kena tuju tesau nya enda tau enda nyendiaka diri bengepan sereta siap enggau senjata perang sida, baka terabai, sangkuh, nyabur, gansai, sumpit, ipuh, pemalu beduri, pedang, ilang, sereta keresa bukai ke diguna lebuh maya besatup enggau bala munsuh lebuh rambau maya nya kelia.

Sekeda ari perengka enggau senjata bukai ke disediaka sida mega nyengkaum langgai tingang, bujak, perambut sereta mega berayang.

Sekeda ke bisi udah kala ditulung serta diberi antu utai, lalu nyendiaka pengaruh kebal, empelias enggau utai bukai baka batu tauka ubat engkerabun ngambika enda dipeda munsuh lebuh maya ke ngayau besatup belaban enggau bala munsuh rambau musim sida ia ka matak serang nya tadi.
Nyadi jalai kangau beperang ke munyi nya tadi udah diketuka ba taun 1900.

Nyadi lebih kurang urung iya dalam taun 1900 ngagai taun 1922 enti Pengulu deka bepanggilka orang bechara, iya deka ngirumka labung pengulu iya ngagai orang ke d’asuh iya datai bechara. Labung nya meh, nyadi ke tanda kuasa sida pengulu ke ngatur chara enggau laya mensia mayuh rambau maya nya. Udah nya, pengulu mega bisi manggil orang datai bechara ngena jalai bekirumka tungkat rutan ke bisi ngundan gambar makota Rajah ba ujung ari pala tungkat nya. Tungkat tu d’anjung ari rumah panjai sebuah ngagai rumah sebuah nyentukka iya datai ba orang ke dituju kangau tesau iya.

Ngambika orang nemu pesan tauka panggil nya beguai, iya dikelapung ke enggau bulu manuk sereta rangkang tauka kayu mit ti udah setengah angus kena tunu.Iya mega mai reti semua utai nya enda tau enda dipejalaika siang malam tauka petang. Semua utai nya nadai tau diketu ke ngapa, enti iya bedau nuntung ba orang ke dituju iya tesau nya tadi.

Enti nyema rumah panjai bisi ditemu enda bejalaika pesan nya, tuai rumah nya deka ditinggang ukum tunggu lima kati (RM3.60) ari pengulu. Enti nyema iya enda ulih mayar tauka enggai mayar ukum nya tadi, tuai rumah nya ulih kena ukum jil empat bulan.

Kenyau ari taun 1930 menya, tungkat ari pengulu dikelapung ka enggau siti surat. Iya mega dikirum ke ngena jalai ka sebaka enggau ke dulu ari nya, ari siti endur ngagai siti endur nyentuk ka iya datai ba orang ke dituju kangau enggau panggil nya. Nyadi chara kitai ke bepanggil betesau ngena utai ke baka nya tadi lama udah diketuka kitai raban bansa, laban ke nitih ke singkang dunya ti nyau udah jauh mansang. Kebuah pia semua utai ke rambau kitai rebak baru diatu dipanggil enggau surat kangau enggau talipaun nitihka atur ke udah diletakka perintah kemaya aritu.

Batang kenang nya tadi atur jalai manggil bekangau minta orang nya datai semua, datai sereta baka lebuh maya bisi penusah, tauka minta sah lebuh deka nurun ngayau dulu menya.

Tang siti jalai ngemegauka orang mayuh minta sah, minta bantu, minta tulung orang datai beguai, kelebih agi menua ke numbas iya penyauh ari pangan diri,iya nya ngemegauka orang ngena terantang tawak.

Nyadi dalam atur tu dulu menya, nyentukka seharitu, setawak sigi agi dikena ngemegau diri serumah, diri segenturung menua, enggau orang rumah panjai ke agi ulih ninga munyi terantang setawak nya.

Penanggul ke suah agi dikemegauka ngena terantang setawak nya penusah orang udah ninggalka dunya injau tu, tauka dikena bepadah sereta ngemegau ke bala mayuh bisi urang udah parai. Reti nya, enti orang nya sigi udah ditemu lama sakit, nama orang bisi ninga terantang setawak panjai tiga kali bejurut, reti nya orang ke sakit nya udah ngapuska seput. Tawak nya diterantang baru enti bangkai iya udah dipansutka ngagai sapat ba ruai. Lalu pia mega dalam adat pemati ke bisi dikena ba ai Krian enggau Saribas, setawak nya diterantang panjai tiga kali bejurut enti lebuh maya bangkai orang nya baru deka nurun d’anjung ngagai pendam.

Atur terantang tawak munyi nya tadi agi dikena nyentuk ka saritu di menua pegai Betong, Debak, Saratok enggau Roban, lalu bisi mega dikena ba sekeda kandang menua bukai baka ba menua Batang Rajang, Kemena, Batang Lupar enggau Baram enggau pati ai sida iya.

Kelimpah ari penusah parai, setawak mega diterantang orang rumah panjai kelia enggau diatu kena minta sah dalam semua penusah ke udah ditulis dulu tadi, baka penusah rumah angus, ampuh bah, kena serang munsuh (dulu menya) tauka penusah bukai baka kena taban tanah tusur, tekusai pangka kabut sereta enggau penusah sereta tasah bukai.

Tau mega kena ngemegau bala bukai minta sah enti diri serumah bisi penusah lenyau, lemas tauka lesap ba ai baka diterekam baya, enggau mayuh penusah ke bukai.

Taja pan pengawa ke baka nya tadi jarang bendar nyadi rambau kediatu,tang utai tu sigi suah nyadi kelia, lalu pangkung tauka terantang setawak nya meh ke udah chukup beguna besai kena ngemegau sereta nesau bala diri sebala ke numbas penyauh alai diau, sereta disadang mudah ulih datai ngesah sereta mantu dalam penanggul ke dikemegauka kitai.

Bepun ari tu meh, setawak nya enda tau diterantang ngapa enti nadai kebuah. Lalu pangkung tauka terantang begau nya mayuh bengkah bunyi, laban sebengkah nya ngayuka sada ke enda sebaka reti. Ngambika banding, enti terantang panjai enda ngetu nya, reti iya madahka bisi penusah besai minta bantu tauka sah tekala nya sereta chukup beguai.

Nyadi kemaya haritu, mayuh bala nembiak rebak baru ke enda nemu ulu ili senentang pekara tu. Tang nadai ga nya ngawa laban semua pekara tu nadai dikena kitai agi. Laban menua udah mansang, semua diatu ngena jalai moden magang - ngena surat, talipaun, internet tauka media massa. Sama bekenang meh kitai ke utai nya tadi,taja dunya udah jauh mansang tang bisi maya iya dudi ari agi tau dikena kitai mega chara ke baka nya.



BESI