HAPPY BIRTHDAY NGAGAI NUAN INDAI SIMBA........

GAMBAR BALA ANAK LEBUH BEJALAI BA KB MALL(MAKAI WAFER)





Ngajih ke nuan panjai umur sereta lantang senang meh dalam semoa pengawa nuan besari-sari.
Kemari 19hb 5,siti ari timpuh endang iya ke semampai dianti sereta diintu kami menyanak niap genap taun. Tang enda nemu ,nama ga kebuah kemari aku tau enda ingat. Nama deh,…. Tumu pagi sida ke indu nanya tudah pangan pagi nya. Laban ke endang sigi amat enda ingat,dia aku nyau bengap bengap ngapa lebuh ke ditanya. Nyau pemuas iya indai tuai aku ke nyebut,nya baru aku ingat ke ari nama sari kemari. Tang seninjik bendar ga bedau ngelebus ari……….”SELAMAT NGINTU ARI PENGADA NGAGAI NUAN INDAI SIMBA”.
Laban ngasai ke diri bisi ilap mimit enda ingat ke ari bulan,kena nunduk ke urang meh ko jako. Kami menyanak lalu nurun ke Kota Bharu nuju KB Mall. Siti ari shopping complex ke besai di menoa Kelantan ditu. Datai dia kami menyanak lalu tama ngagai kedai gari Giordano. Laban ke selalu bebeli ke gari dia,nama deh bala salesgirl lalu ngelala. Aku lalu ngasuh Indai Simba milih seneka ati iya meh bala gari dia. Ngicha ke ati urang chelap,lalu nyadi ke pemeri ari aku beserimbai enggau ari pengada iya kemari. Akai sendat asai seput meda rega bala gari ke dibeli indai tuai,tang laban ke nunduk ke indai tuai,enda memunyi aja meh tudah pangan. Nya meh kekadang ketegal ke selalu kiruh mayuh pengawa,utai ke patut diintu enggau diri sebilik tau mega enda ingat. Tang sida ke indu tentu mereti ke kitai laki tu, enda ingat ukai ketegal kitai nadai penyayau enggau pengerindu agi ngagai sida iya. Sekali agi aku meri SELAMAT ARI PENGADA NGAGAI NUAN INDAI SIMBA…………………..

PENUSAH JALAI ALUN KE BISI DIPANSA LEBUH NURUN KE KOTA BHARU

Nyadi dibaruh tu sekeda ari gambar penusah ke sempat diambi ngena c902i aku.











Urung iya pukul 11 lalu pagi 16/o5,penusah jalai alun tu tadi nyadi. Nitih ke dipeda aku,lori tu nadai belantak enggau nama nama. Nyangka tak kelalu laju tudah kaban tu tadi,nya alai iya lalu jayar kediri. Nasib iya manah,laban nadai naban ke nyawa. Semina bala telu manok ke diundan aja meh ambis pechah ditaban ke lori nya tungkup. Penusah bekaul enggau lori pemai barang endang sigi suah amat udah nyadi dipeda aku ditu. Nya meh penyadi iya enti kitai deriba jegak jegak sereta enda mereti. Sama sama berati meh kitai,awak ke kitai bejimat lalu mereti agi ari ke udah nengah jalai alun,laban penusah ke baka tu enda disadang kitai kemaya iya tau nyadi. Anang baka kaban tu,pelaba ke aku nadai gaji iya bulan tu,ambis gaji diputung tukey nganti telu selori enggai pechah.

PUN PENEMU BERINTU KA INDU BERANAK ENGGAU PEMALI TAJU REMAUNG

NIANG EX TR BANYAN AK BESI BENUNG BIBAT LENGAN ENGGAU MENYADI IYA PEMANCHA JANTAN.(gambar tu diambi enda kurang ari 20 taun ti udah,lebuh maya ngintu ari gawai dayak ba RH KAYAN NANGA MANGUT, MACHAN, KANOWIT)


Kitai bansa Iban tu endang sigi balat amat dipuji mayuh bengkah bansa bukai dalam dunya tu,nyadi kitai bansa Iban balat dipuji, kelebih agi baka bala sida bansa ribai.Kebuah piak, laban kitai bansa Iban tu bempu ke chukup mayuh macam jerita, ensera sereta macam macam bengkah main asal enggau adat ti chukup nyelai, tang manah sereta agi mengkang dikemeran ke kitai bansa nyentukka saritu. Baik ke nya pengawa ke bisi besangkut dalam penemu beridup kediri, penemu bumai betaun, penemu begiga ke jelu enggau ikan sereta mega lauk ke bukai ari ai, ari babas lalu enggau mayuh macham bansa pemakai ke bukai.Pengelandik nya endang sigi bisi dikembuan ke bansa kitai kenyau ari serak tubuh sida aki ini kitai dulu menya nyentuk ke saritu.Pengelandik kitai Iban besenentang enggau pengawa ke bakatu,sekeda nya ulih disidi ka kitai ari dalam bup,lalu sekeda nya semina ari tusui pangan diri sereta ajar ari bala urang ka tuai.
Beduduk ari diri ke balat sayau ke pengawa asal kitai bansa. Lalu ke tambah nya mega,laban ka ngira bala kami ke rebak dudi tu udah jauh amat tinggal sereta nemu penatai asal diri,pengawa enggau adat main asal kitai bansa Iban. Nya alai aku deka ngunsi ke enggau bala siti jerita lama kitai bansa,iya ke disalin aku baru ari bup Pong Kapong ke ditulis Kadir Umbat. Jerita tu manah bendar ,lalu di pelaba ka aku iya tau bendar mulai ka pengingat kitai nembiak ke rebak baru diatu.
Nyadi cherita ke deka dikunsi ke aku ditu,siti jerita besenentang enggau pengawa kitai Iban ke beranak dulu menya. Nyadi cherita ke bakatu tu mayuh bengkah kala didinga ka kitai,seneka kitai empu aja milih ari ni kuing enggau tunga jalai cherita iya.
Nyadi kelia menya, rambau maya menoa ke agi semak enggau sida petara,semak antu semak jelu, rambau kitai anak mensia bedau tentu jauh ngejang ari utai bukai dalam dunya tu, agi begulai sejalai enggau semua utai idup. Nitih ke jerita tuai,sida ke indu lebuh datai maya deka beranak,sida deka dibuntas pia aja. Bedau kala bisi siko pan sida ke ulih idup lebuh ke beranak maya nya kelia,anak sida iya idup tang indai iya mati. Beduduk ari sida ke nadai chara bukai ngulihka anak nya, enti enda ngena jalai muntas perut indai iya. Nya kebuah rambau maya nya kelia nadai siko pan entara sida ke ulih beranak lebih ari sekali.
Lalu rambau maya nya menya,bisi siko lelaki ke penama iya Ungit. Ungit tu bedau tentu pengelama iga udah niri ke ruang bilik begulai enggau bini iya. Nyau pengelama seduai ke udah begulai enggau pangan diri,dia deh tudah bini Ungit tu tadi lalu ditemu udah bisi tubuh. Meda bakanya,tudah aki kitai Ungit tu menya balat amat tusah ati. Laban ke ngenang diri deka ditinggal ke bini ti di kesayau ke tudah tuai iya mati lebuh ngada ka anak seduai iya ila.
Ati tudah Ungit tu tadi balat amat tusah lebuh ke ngenang ka bini iya deka mati,dia deh tudah Ungit tu keno ko jerita tak selalu nyeliah sereta ngenyauh kediri ari ke begulai enggau urang bukai agi. Semua pengawa begiga ke lauk babas enggau turun ke tanah dikereja Ungit kediri magang. Ko cherita,nyau kepemuas tudah Ungit tu ke selalu pereman mai diri ba sebelah tanah enggau babas,dia deh ari siti lebuh tudah ke turun ka babas kediri diri, dia iya bisi ninga utai nyau chapuh ba puchuk kayu din. Tudah Ungit tu tadi lalu ngansak mansang semak-sesemakka agi,iya lalu belalai ba pun kayu ke enda tentu jauh ari utai ke chapuh nya tadi. Laban ke deka nemu nama utai ke ngasuh sida nya nyau chapuh.
Dia deh Ungit tu tekenyit amat,enda mukai mukai dipeda iya bala mayas benung ngeringak bebelaka siku indu gali ba atas rajang. Dipeda iya mayas nya tak betekan ka perut indu nya,lalu enda lama udah nya Ungit lalu tekenyit,dia iya meda anak indunya lalu ada.
“Nya lia tenchang ba dan kayu,” ko jaku sida didinga iya. Udah nya peda iya lia nya tadi lalu diunsut-unsutka sida ba sebelah tubuh indu ke beranaknya. Enda lama udah bekau indu nya diunsut enggau bala lia nya tadi, dia iya meda indu nya lalu tau duduk.
“Nya gaya mayas ngintu indu beranak, ni enda idup indai iya,” pia ku Ungit bejako kediri.
Seninjik bendar ga baka ke disumpah antu,dia iya bisi tepeda ka lia mayas nya labuh ari puchuk kayu ke alai sida ke ngintu indu nya. Tudah Ungit lalu ngansak semak ke agi begadai gadai nangi ke didinga ke bala mayas nya tadi. Lebuh maya mayas nya enda tepeda ke iya, Ungit lalu beguai guai beambika bala papung lia nya tadi. Papung lia nya tadi lalu dibai iya pulai ngagai bini iya. Datai dirumah seduai iya,Ungit lalu nusui utai ke bisi dipeda iya ngagai bini iya. Dia iya lalu madah ka ngagai bini iya bakani ke gaya sereta jalai mayas ngintu indu beranak baka ke udah dipeda iya lebuh ti bejalai begiga ke lauk dalam babas tadi.
Udah nya Ungit lalu mai bini iya pindah,seduai iya lalu diau kediri jauh mimit ari pendiau urang bukai. Papung lia ke dibai Ungit nya tadi lalu ditanam ka seduai iya melaki bini. Lia nya pan lalu nyadi senyadi sereta nyau makin betambah mayuh.
Kira ke nyau datai ba bulan bini Ungit ka beranak,Ungit lalu naban ke bini iya ngagai lubang batu. Laban Ungit nangi ke bini iya kena laban ribut enggau ujan enggai ke tubuh bini iya enda nakal,lalu tau ngujung ke nyawa bini iya lesi bebadi. Enda lama udah nya bini Ungit pan beranak,iya lalu bebela ke bini iya nunda gamal bela bala mayas ke udah dipeda iya dulu suba. Naka meh pengiruh tudah Ungit tu bebela berintu ke bini iya beranak. Beduduk ari pengangkun sereta penyayau Ungit ka bini iya,dia iya lalu mujur ngintu bini enggau anak iya. Bini Ungit nadai apa,anak seduai iya pan gerai. Ko cherita,bini Ungit tu lantang bendar ati iya,meda diri ke agi idup udah bekau ke ngada ke anak seduai iya keterubahnya. Lalu bini Ungit nya meh indu keterubah ba menoa nya ke idup udah bekau ke beranak.
Dia iya lalu minta di penyadika Ungit api, laban deka di kena iya bekindu ngangatka tubuh, laban enti tubuh angat,deka berasai nyamai agi,enda nyilu. Lalu nya meh keterubah asal bala indu nemu bekindu udah sida iya beranak. Tang kemaya ari diatu,pengawa bekindu tu nyau jarang dikereja sida ke indu,semina bala ke diau di rumah panjai aja ke agi balat amat ngemeran ke bekindu enti udah badu beranak.
Nyau pulai ngagai bala sida Ungit serumah,nyadi bala sida iya serumah nyau balat amat irau ati. Laban Ungit seduai bini iya lama amat udah nadai dipeda sida iya. Sida lalu belabuh begiga ngagai langkau seduai iya,datai dia nadai ga seduai iya dia. Meda aki kitai Ungit seduai bini tu menya nadai dia,bala sida Ungit serumah pan lalu begiga ngagai sebelah lubang batu. Datai sida dia,sida iya lalu belabuh bekangau ka nama dua iko melaki bini nya,tang nadai ga ninga nyawa seduai iya nyaut. Nyau kepemuas iya,sida iya ke dia. Dia deh sida bisi meda asap pansut ari lubang batu. Sida iya ke begiga ka Ungit enggau bini iya nya tadi pan lalu bisi ensium utai tak bau rengut. Kati enda bau rengut disium sida,nya ga lia ke dikena bini Ungit ke baru udah beranak.
Meda baka nya,sida iya sebuat pan lalu tama ngagai lubang batu,datai sida iya din,sida iya lalu tekenyit meda bini Ungit benung bekindu ngimbai siku anak mit ti baru ada. Ungit tu tadi lalu dipeda sida iya tuchum ketawa nyenguk gamal anak lelaki iya ke baru adanya. Udah bekau sida iya serumah meda pemujur bini Ungit tu beranak,sida iya lalu betanya ka ngagai Ungit bakani ke jalai tudah tuai berintu ke bini iya beranak lalu tau enda mati dibuntas. Ungit pan lalu nusui meh ari pun nyentuk ke ujung bakani ko gaya iya meda bala mayas berintu ke indu beranak munyi ko ari pun jerita tu tadi. Iya lalu madah ke bala sida iya nya tadi tau ngambi tambak lia nya ari semak langkau seduai iya. Ngambi ka bisi engau sama betanam ke lia.
Berengkah ari nya kelia,bala kitai mensia pan lalu berengkah betanam ka lia,sida iya serumah balat amat pengangkun ka Ungit laban ke udah bulih penemu di kena ngintu indu beranak sereta lalu deka bebagi ka lia ngagai bala sida iya. Sepengudah serak tubuh sida Ungit nya kelia meh pun kitai mensia nemu ngintu bini beranak.
Nyadi siti utai ke nyelai amat ,tudah anak Ungit tu tadi tak bebulu,lalu lebuh iya makin mansang besai,bulu iya pan nyau majak bauh sebauh. Lebuh anak Ungit tu nyau besai bendar,dia deh bulu tudah tuai nyau belikau likau. Meda utai baka nya nyadi ba anak seduai iya.
Dia Ungit seduai bini iya pan lalu bejako enggau anak seduai, “Oh, kati alai nuan tu tak bangat nyelai amat ari orang bukai deh anak, tak bebulu. Tubuh nuan anak baka mensia, tang nuan tu tak bebulu baka jelu. Enda meh kami duai indai nuan nemu begulai enggau nuan tu anak,” pia ku Ungit tu tadi bejako enggau anak iya. Ninga jako apai iya nyau munyi nya,dia deh anak Ungit tu tadi lalu nyaut jako apai iya.“Endang sigi amat jaku seduai nya apai, lalu enti seduai enggai begulai enggau aku, kati ko aku enggau iya deh apai, indai,” pia ko saut iya.
Udah bekau nya, anak seduai iya nya tadi pan lalu mupuk ninggal ka seduai melaki bini iya kediri. Apin tentu jauh iga pengudah iya ngejangka endur nya, iya pan lalu bebali nyadi remaung. Datai iya ba semak tuchung Bukit,dia iya lalu negung inggar bendar.
Nyau munyi ko dalam leka sebut bala sida Lemambang timang jalung, lebuh ke nyebut datai ba menua remaung: …Nya ga menua aji ke berani tau tenung raja suka remaung, iya ke landik negung, lubang ooh mua,…ooh mua lubang.

Ninga utai nyelai amat munyi nya,Ungit seduai bini iya bisi bendar pengirau ati ngagai anak seduai iya. Ungit lalu bejako kediri.“Nama utai empu nyawa nya, antu jelu kini?” pia ko Ungit. “Enti baka menua ke bisi remaung, tentu nya utai ke empu nyawa. Manah aku nyidi bekau anak tua tadi,” pia ko Ungit.

Iya lalu nyidi bekau kaki anak iya tadi, tang semina tetemu ka bekau kaki jelu aja ke bisi dipeda.

“Tentu udah mati meh tudah anak aku tu, empa jelu ke bemunyi nya tadi,” pia ku puchau tudah Ungit. Iya pan lalu mulai ke diri ke rumah seduai iya, datai din iya lalu madahka ngagai bini iya bekau anak seduai ti nadai temu penunga, mina ke bisi ditemu bekau kaki jelu aja.

Enda bangat lama udah nya, kira dua ari udah bekau anak seduai iya ninggal ke seduai melaki bini, dia seduai bisi ninga nyawa utai negung semak endur seduai ke diau dia. Ungit pan lalu pansut ari lubang batu, lalu besampi meh tudah tuai iya.
“Aku nadai kala ninga utai munyi tu. Enti nuan nya antu tauka jelu, anang munuh anak telesak aku. Enti nuan udah munuh anjung pulai kitu bangkai iya.”
Enda lama udah bekau Ungit tu ke besampi,dia tak semerap munyi utai didinga iya dalam babas ke semak alai iya ke bediri nya tadi ,lalu tak di peda Ungit tak anak iya empu ngayan kediri dia. Dia anak iya lalu bejako, “Anang agi bejako nuan apai, aku meh ke bemunyi didinga nuan nya tadi. Aku tu nyadi remaung. Seduai indai diau manah-manah enggai ka aku saru, ko iya meri jako tangkan ngagai apai iya.
Iya lalu nampung jako, “Enti kita meda bekau aku makai, anang negu bekau nya. Enti kita meda tai aku, bap enggau daun idup. Enti kita meda tubuh aku empu, anang tak terus lalu belanda, terus rari. Surut dulu,udah nya baru belanda.
Tudah Ungit seduai bini iya tu tadi nyau nyinuk bendar ninga ajar anak seduai iya. Anak iya nya pan lalu nampung jako iya baru, “Nyadi tu pantang enti lebuh maya kita berapi, anang mutarka papung unggat. Anang nunu lemetak tauka gamat. Enti kita diau ba langkau, anang ngelempaika utai ba mua pintu.
“Anang sesekali nyakap kami enggau jako. Enti kita meda buah tau tak bisi, nadai batang nadai pun, anang makai buah nya. Nya taju ditaanka kami. Enti kita makai buah nya, kita deka mati ulih kami,” pia ko jako anak nya tadi ngajar apai seduai indai iya. Udah nya iya lalu lesap, nadai temu penunga agi.
Agi dulu kelia,endang amat mayuh remaung diau ba pulau Borneo tu, tang diatu nyangka nyau udah punas kini.
Kebuah orang nemu bisi remaung laban orang mayuh tetemu ke kerubung kerang kerubung lukan ba sebelah mua lubang ba atas tuchung Bukit ke tinggi tinggi.
Kemaya ari tu, enti kitai bisi rembus ngagai kampung jerung tuai nadai didingaka kesung nyumbuh bujang, kampung sunyi nadai dinga kesuie munyi orang orang, lalu enti kitai bisi ngereja utai salah pantang, tau kitai bisi ninga nyawa remaung. Tang nya ukai iya ti bendar, nya nyawa antu mali diri nyadi remaung.
Nya alai bepun ari cherita Ungit seduai bini enggau anak iya ti bebali nyadi remaung,nya ngemun ka bala kitai bansa rambau nya lalu belabuh nemu ngintu diri beranak. Ka tambah nya sida mega nemu bebasa ka antu ka jelu lebuh maya ke bejalai dalam babas enggau kampong puang,kelebih agi ketegalka takut kena laban taju remaung. Nya meh kebuah adat lama enda tau ditinggal tauka dilengka ke kitai taja pan kitai kemaya ari tu mayuh udah masuk ngagai pengarap ke baru. Laban adat enggau pengarap lama kitai bansa endang sigi agi bisa sereta tau nganu enti dilaban kitai. Kitai tu tuchi darah Iban,enda ulih dikeenggai ke kitai,antu agi semak enggau pengidup kitai besari sari.



BESI

SOPHIA SIMBA ENGGAU ERNEST VINSON BANYAN

Ketegal pengamu ngujung ka diri lebu,nya disema ka baka manuk lepas, jari bau tai.


Ensera mayau tu manah amat diperati ka kitai semua,laban pengamu nadai ngira nama bansa tua enggau sapa tua. Pengamu mensia semampai bisi nyadi dalam siti-siti raban bansa ba dunya tu.Ulah ke amu nya ngelebus tauka ngeluie ari adan bansa,adat,pangkat sereta kaul kitai besari-sari. Pengamu tu bisi dikembuan nadai ngira pemanah enggau penyai pendiau kitai,sereta nadai ngira tua tu kulit burak,chelum tauka mansau. Salah munyi jako seleka, pengamu bisi dikembuan genap iko kitai mensia,semina nyadi ke bida iya,balat enggau kurang aja.
Pengamu ke bisi dikembuan ka kitai mensia tu, endang sigi lama udah nyadi sereta nekul pendiau enggau pengidup kitai mensia ke nguan dunya tu.Pengamu ukainya baru nyadi ketegal dunya ke udah jauh mansang,lebuh semua utai nadai agi sekat serata dunya,lalu pia mega dunya it ti nadai adan enggau pengujung iya rambau kitai kemaya ari tu,tang ulah ka baka tu endang sigi udah lama dikembuan ka kitai, kenyau ari tubuh sida aki ini kitai kelia menya.
Bedudukka ari pengamu bala kitai mensia meh kitai suah amat ninga kin kitu bisi aja penyarut didinga sereta dipeda kitai,macam-macam laya ke bisi nyadi,baikka nya berebut ke reta,tanah,pangkat,kuasa,lalu sekeda nya berebut deka nyadi raja megai mensia sereta berebutka kuasa deka beempu ke dunya.Lalu nadai bekira ke penusah enggau pemedis ke bisi ditapi urang bukai ke nanggung pemerinsa ketegal pengamu sida iya.Utai ka baka tu nyadi endang sigi beduduk ari pengamu ati kitai mensia empu.
Aram kitai sama nikal baru ke belakang lalu sama berunding sereta sama beratika nama kebuah Perang Dunya 1 enggau 2 tau nyadi dulu suba?Nya endang sigi nadai kebuah bukai,beduduk ari ketegal sida deka naluk ka menoa bukai lalu megai kuasa dunya ngena jalai perang ngelemi sereta ngalah ka menoa bukai.Lalu bakanya mega kebuah Perang Teluk tauka Gulf War tau nyadi.Ambi ka banding kitai,nama kebuah Bush ngalahka Saddam ngagai Iraq?Nama kebuah Amerika nyerang Afghanistan?Nama kebuah sida sama bansa Tambi belaya,charut berebut ka menoa India enggau Pakistan?Laya ke baka tu nyadi,endang sigi beduduk ari kitai mensia ke kelalu amu deka megai kuasa enggau dunya.
Nya alai tusah amat deka diseliah ke kitai penusah beduduk ari pengamu tu ,Pengamu tu tau nuntung kitai sebarang maya,lalu nadai ulih dikerari ke kitai.Ambika chunto enggau banding ba menoa kitai Sarawak empu,ketegal pengamu ke bisi dikembuan menoa Jipun deka naluk menoa kitai dulu kelia,semoa pupu raban bansa enda ngira Iban,Cina,Laut,Kayan sereta raban bansa ke bukai di Sarawak udah sama ngasai magang napi pemerinsa rambau maya diperintah Jipun kenyau ari taun 1941 nyentukka maya sida iya alah lalu nyerah ka diri dalam taun 1945 menya.Utai tu bisi nyadi ba kami sebilik empu,niang aki aku Ex TR Banyan Anak Besi dipansar Jipun nyadi ke sedadu sida iya.Mayuh macam meh penusah ke bisi nyadi,nadai ulih dikeenggai,enda pia diri sebilik mega lalu deka diperinsa ke bala Jipun. Taja pan ati enggai,tang mansar diri meh nurut utai ko sida,laban nangi ke diri sebilik pedis laban Jipun.
Nyadi ba kitai nembiak raban bansa Iban,endang sigi dilalau sereta diajar bala apai indai enggau aki ini kitai kenyau ari mit ngenyauh sereta nyeliah ka diri ari ke ngembuan ulah amu tu.Ngambi ka banding,lebuh maya makai,kitai diajar enda tau kelalu rangka,nyema kitai dulu makai ari bala bukai,anang sesekali kitai nadai ngalau ke urang bukai nya pemakai.Laban ke endang diajar apai indai ari mit bedua ka pemakai enggau utai bukai,kitai anak Iban sigi enda mudah rangka sereta nemu bedua ke utai enggau pangan diri.
Ketambah nya mega,lalau ba senentang pengamu tu bisi mega diselit sereta di ripih ke sida ke tuai dalam ensera enggau jerita lama kitai bansa.Kelimpah ari nya mega,kitai bisi dilalau ngena jako terang nagang kitai enggaika amu.
Nyadi ditu aku bisi siti jerita deka dikunsi ke aku enggau bala kitai semoa,jerita tu bisi dibacha aku dalam bup ke benama “Sekeda Cherita Pandak” ke ditulis niang Edward Kechendai tauka Enday lalu dichelak sida Borneo Literature Bureau.Jerita tu manah amat dibacha aku, jerita tu bekenang ke ulah kitai, beduruk ari pengamu kitai tau ngasuh pala kitai nadai ngembuan runding ke bebatang,lalu ngejung ke tua beba sereta mantul dalam pendiau kitai besari-sari.
Nyadi kena ngepun ke cherita tu, dia deh bisi siko indai tuai kitai bansa Iban menya, bisi ngerami ikan ngena garam ba langkau umai.
Benung tudah tuai kiruh begeramika ikan nya,dia deh bisi siku mayau kuring ka jai amat gamal datai ari langkau orang bukai lalu datai ngagai langkau indai tuai tu tadi. Tang laban indai tuai nya benung ngeringak begeramika ikan nya tadi lalu nunga ngagai dapur melakangka mua pintu, ka tambah nya mega pending tudah ke enda tentu lansik agi, nya kebuah iya enda meda sereta ninga mayau kuring nya niki tangga langkau iya.
Laban ke endang sigi udah awak mayau kuning nya tadi, dia deh enda chechamang tudah mayau kuning jai gamal nya tadi merejuk nuju indai tuai nya lalu ngerampas sereta manggum siku ikan ke besai agi ari dulang tapang ke alai indai tuai nya ngerami ikan.Nama ga enda pengaga mayau nya tadi,udah mujur bulih ikan besai.Mayau kuning jai gamal sereta kurus nya tadi lalu rari engkechit terejun ari tanju langkau indai tuai nya naban ka ikan ke udah mujur ditaban ke iya.
“Ko jerita, indai tuai nya nyau abis ka teberurut kain ke benung dirasukka iya nya, laban ke beguai angkat deka matak anak sepit ke bisi dipanggai ka iya ba entilang dapur ka dikena iya malu mayau nya , lalu beguai belanda nitih ka mayau kuning nya tadi. Tang dini ulih gagai tudah tuai iya mayau nya. Kitai sama nemu penyikar enggau pengelaju mayau,ketambah nya mega, indai tuai nya nyau numbas iya pengeregas,tak changuk- changuk ngapa. Lalu nadai meh iya nemu penunga mayau nya agi,”
Nyadi nitih ke ditulis niang Kechendai, mayau kuning nya tadi enda lalu nabanka ikan ulih iya terus pulai ngagai langkau orang ka beempu ke iya, laban iya mega bisi penangi sereta takut ka ikan ke dipanggum iya nya dirampas tauka diperebutka bala mayau bukai bisi diak, ke sigi pama pemayuh iya ba langkau nya.
Nya alai mayau kuring nya tadi lalu manggum ikan nya meraka sungai ke numbas iya pemesai. Ba sungai nya bisi siti batang ke nyengkar ai meraka ngagai tebing seberai, lalu nyamai bendar dititi iya nyemerai ke tebing seberai. Lebuh mayau kuring nya bejalai gadai-gadai niti batang nya,iya lalu malik ngagai ai sungai nya, dia iya lalu tepeda ka siku mayau chelum bisi ari baruh iya,mayau chelum nya tak manggum ikan ke besai agi ari ikan ke dipanggum iya empu. Gamal mayau chelum nya pan jauh besai agi ari gamal iya empu.
“Sereta mayau kuning nya tepeda ka mayau chelum nya,diak deh mayau kuring nya lalu berunding sereta bisi ati deka ngerampas ikan ke dipanggum mayau chelum nya, laban ikan nya besai agi ari ikan ke dipanggum iya,” ku iya agi.
Lebuh mayau kuning nya ngetu lalu merening mayau chelum ke ari baruh iya nya, mayau chelum nya mega ngetu. Benung mayau chelum nya jenuh, mayau kuning nya lalu terejun nerekam mayau chelum ke ari baruh iya, laban iya deka ngerampas ikan ke dipanggum mayau chelum nya ke berupai amat besai agi ari ikan ke dipanggum iya empu.
Mayau kuning jai gamal ke terejun nya tadi lalu labuh ninggang lubuk ari baruh batang ke dititi iya. Lebuh iya terengkah ba lubuk nya, ikan ke dipanggum iya tadi lalu tebelengka ari nyawa iya laban iya empu nyau ka lemas. Ikan ke tebelengka ari panggum iya nya tadi lalu rarat ditabanka ai kili, nyangka lalu tengelam nadai temu penunga agi.
Laban mayau ke enda kala nyelam tauka enda kala mandi – anang ka mandi, nyema bisi kena pecik mimit enggau ai pan engkechit rari enda baapai enda beindai – nya alai iya nadai akal kena ngambi ikan ke udah tebelengka ari panggum nyawa iya, taja iya rangka bendar deka makai ikan.
Nyadi beduduk ari jerita tu meh mun iya kitai Iban ngena jako sema: ‘mayau nemu makai ikan tang enda nemu nyelam’.
Udah mayau kuning nya nyemerai ngenataika diri ba tebing, iya nadai tepeda ka mayau chelum ti deka direkak iya nya tadi agi. Dini ka agi bisi dipeda iya,iya ga mayau chelum ke bisi dipeda iya tadi nya ayuk iya empu ba lubuk baruh batang ke dititi iya. Tang laban iya empu ke kelalu amu, kelalu angam sereta rangka, dia iya semina asa nilat bulu diri empu ke basah, enggau nilat mulut diri empu ke udah manggum ikan.
Perut tudah tuai kapa ka ngira agi nyau engkerau lapar, tegal enda sempat makai ikan ke ulih iya ngerampas ari indai tuai orang nya tadi. Ngachau amat ga ayuk iya empu nya tadi. Udah nya tudah lalu mulai ke diri,mai perut lapar sereta ati ti asa.
Datai iya ba langkau orang ke bempu iya, orang nya lalu meri iya makai asi bechampur enggau sedak pala ikan masin, tang pemakai ukai diungkupka ngagai iya siko, nya pan bebagi enggau bala mayau ke bukai. Nya meh bala mayau ke deka dikerarika iya lebuh ke udah ngerampas ikan ari indai tuai orang ba langkau enda bangat jauh ari langkau sida iya.
Pulai ngagai mayau kuning ke udah naban ke ikan nya tadi,nyau jengo-jengo meh tudah tuai meratika kini penunga mayau chelum ke manggum ikan besai ke bisi dipeda iya ba baruh titi nya tadi. Malik ngagai luar langkau sereta tunga ngagai ai sungai nya tadi nadai ga meda mayau chelum nya.
Keba keruan kitai mayau lalu enda nemu ayuk diri empu. Uji tak lalu dipakai iya abis ikan nya tadi, enda ibuh ditaban dibai rari ngenyauh nya ari orang bukai, enda ga asa. Tang laban mayau tu baka kitai mensia mega, sigi mayuh pengamu, nya alai semina asa ati aja meh laban pengamu diri deka bulih iya ke mayuh sereta besai agi. Udah bulih iya ka numbas pemesai,deka begiga iya ke besai agi, lalu enda tepantup pengamu nya tadi.
Ukai siku ti udah ngayanka pengamu bakanya. Tang pengujung iya, enti lalu enda besekat, suah amat pulai ngagai penusah sereta pemalu. Ambika banding sereta chunto,uji peda kitai ngagai bala ulah tuai ka megai menua kitai. Udah nyadi tuai megai menua, udah nyadi tuai perintah, agi ga bisi utai giga. Ambis tanah adat enggau asal kitai dirampas ngena leka jako deka meri pemansang ngagai kitai Iban,macam- macam ga leka semaya bisi didanji ke enggau kitai. Tang utai nya jarang amat ga bisi ngenatai ke penguntung ngagai kitai Iban. Semina ga ngasuh kitai nadai alai betanam betupi,tang iya ke untung nya tukey-tukey besai lalu enggau iya empu aja. Tang lalu bedau tembu ga ati iya,puluh iya taun udah duduk nyamai ari atas pemerinsa kitai bansa asal. Lalu enda ngeleka neju ka urang bukai duduk diak. Enda ibuh aku nusut ke ditu sapa bagi iya ke baka nya,kitai sama bisi mata enggau pending,sama berati meh kitai. Sapa ke tau disema ke kitai baka ke dalam jerita tu,nadai urang bukai ke pengabis iya lama udah megai menoa kitai. Nyangka nya meh ke dikumbai orang, ‘tuai apin tembu ati enti apin ulih nyuluk bulan’.
Tang anang sida enda bejimat enggai ka bulan ulih dijuluk tang kejung iya labuh lalu ninggang sida iya empu. Bisi maya iya dudi ari tau labuh teterap tetingkap ,tesangkut laban ulah ke digaga iya ngagai kitai raban bansa Iban.
Nyadi begempung lalu beserakup meh kitai bala anak Iban,niri negi ke bansa kitai baru. Enti kitai enda ,sapa agi deka ngari ke bansa kitai empu,sayau enti nyema kitai Iban tu semina ngambu diri Sarawakian tang nadai beempu ka utai diak jemah ila. Bala pemesai-pemesai enggau ketuai-ketuai kitai bansa Iban tu,aku ngarap ke kitak anang munuh sereta ngindik anak bansa diri empu,enggaika ketegal pengamu kitak bansa diri empu alah laban bansa bukai dalam semoa pengawa. Laban pengamu nya tau ngenusah ke kitai empu jemah ila,enggai ke disema ke urang manuk lepas jari bau tai.”DANI ANAK IBAN,UMBAS BADU AGI TINDUK,ARAM ANGKAT SAMA NGERING KE BANSA IBAN”sinu ke uchu ichit kitai jemah ila.



BESI