Wednesday, May 06, 2009

PEMULIH PADI NYADI KE TANDA PENGERAJA KITAI IBAN KELIA

Ketegal bumai nya nyadi ke pun pengidup kitai raban bansa Iban kenyau ari kelia nyentukka saritu, bala raban bansa kitai Iban siru sereta angkun amat berintu ka umai padi enggau beras ke nyadi leka asi.
Sida aki ini, bala tuai dulu suba bela madah, semua pengeraja kitai Iban menya endang sigi bepangai ari pemulih pemisi padi magang-magang. Nya meh kebuah ketegal umai nya meh pun pengidup kitai bansa, nya meh kebuah kitai Iban jimat bendar bepegai ka adat bumai betaun. Sida mega jimat berintu ka padi sereta mega beras tauka asi. Empa penyimat enggau penyiru sida,ambi ka banding, enti nyema asi bisi belimbur kia-kia, asi nya enda tau enda diputik sida iya enggau naka penyiru, enggau naka penangi.
“Dalam niap genap buah rumah panjai kitai Iban, endang sigi bisi siku orang ke digaga tau ka dipadu ke nyadi kepala bumai betaun. Nyadi orang ke dipadu ke nyadi kepala nya tadi,sigi enda tau enda orang ke nemu pasal burung, ngelala pejalai bintang enggau bulan, likun pendiau, lalu ruai tikai iya enda tau sekali-kali alai ngempuru ka laya enggau chakah indu anembiak,kebuah piak laban enggai ka ruai iya nya tau kamah laban bekau pengamah enggau penyai ulah bala ke bisi diatur laya enggau chakah nya tadi. Pia mega orang ka deka di pilih sida sekayu rumah panjai nya endang sigi enda tau enda orang ke pemulih padi enggau reta tengkira ke bukai, reti nya orang ke pama agi sereta udah mujur amat dalam pendiau pengidup iya enti dibanding ke enggau sida serumah ke bukai.
Enti nitih ke adat sida aki ini kitai bansa Iban tu kenyau ari kelia menya, kejang deka belabuh bumai, kepala taun enda tau enda mai nembiak iya baum alai iya betanya ka utai ti deka dikereja sida serumah ka taun nya, enti nyema endur bumai udah ditetapka alai ba aum tuai rumah ka dulu ari nya.
Dia sida lalu betanya ngagai pangan diri sekalika taun ke udah-udah nya chelap lalu likun ba pengidup padi. Tauka iya bisi asai renga mensengna lalu ngejung ka nadai bulih padi. Enti nyema iya bisi renga mimit ba taun ke dulu,dia deh tuai nya lalu bebai ka bala orang ngenselan menua ke dikumbai Buling ka Menua. Tang enti nyema ba taun ke dulu nya manah, sida iya lalu nadai besebut ke utai tu.Baik ka manah tauka jai taun ke dulu, sida semampai gagit deka niri ka Gawai Batu kena bechelap lalu ngemanahka umai taun ke baru.
“tang enti nyema menua nya deka digenselan, babi siku enda tau enda dibunuh ditambah ka enggau anak itit siku, pia mega siku tauka dua iku manuk deka dikena lebuh ka miau piring nya tadi. Orang ke ngereja pengawa nya enda tau kurang ari tiga ngagai lima iku. Endur sida enselan nya ba menalan lama sida iya, enti nyema nadai teulih ka alai mungkal endur baru,”
Ba senentang atur piring, siti piring deka di tumbak, siti deka di engkah ke ba atas para, siti deka di engkah ke ba atas keresang,lalu empat iti deka di engkah ke ba sukut para enggau siti deka di buai ka ai. Udah tembu pengawa miring nya baru sida belabuh ngaga serepak enggau pentik digaga ari kayu kumpang tauka menuwa dua iti. Tembu nya, baru tuai orang ke ngenselan menua nya tadi lalu besampi lebih kurang munyi tu:
“Tu aku miau ka manuk, kena miau piring, miau ading, miau perengka, miau tengkira. Ngambi ka nadai runggang, nadai timpang, bisi semua, bisi sereta. Kebuah alai pengawa kami bakatu, laban kami tu enselan menua, enselan tanah, enselan ai. Laban menua kami taun siti tu kemari udah diasai ka kami bisi menawa, bisi senika, alai kami nanam padi, nanam tempuli.
Kami tu minta tulung Petara Aki, Petara Ini, ke menya ke kelia. Kami tu endang nampung endang nerujung, endang niti endang nali ajar Petara, ajar Sempulang Gana, kenyau ari kelia nyentuk ka kemayatu. Kami tu nyau deka bumai baru meh, nya alai nyau ka nuchi, ka meresi, ka ngupas ka ngendas, muai Antu Menawa Antu Senika, muai Antu Kudi, Antu Bebali.”

Udah tembu ketuai pengepun pengawa nya besampi, nya baru munuh manuk enggau babi. Darah deka di timbunka mimit ba atas mua lubang ke alai darah nya siuh. Darah ke siuh nya lalu ninggang piring enggau tanah dalam lubang. Udah tembu pengawa munuh babi, nya baru nganjung semua piring ke disebut nya tadi ngagai endur sida siti-siti nitih ka ungkup bagi ke patut. Nyadi ba senentang darah manuk enggau darah babi, ke bisi ditimbun mimit nya tadi lalu di bai pulai ka rumah panjai.
Ketungkah datai meh sida di rumah,sida lalu begerah nesau sida serumah ngasuh siku sepintu nganjung batu, duku kena mantap enggau pengait, ngagai langkau panggau ke udah digaga orang ke tinggal di rumah, tinggal orang ke munuh babi enselan menua dulu tadi.
Udah nya kepala taun ke nyadi tuai gawai miau ka manuk baru kena adat beranchau ka tikai. Orang dulu ngerembai ka tikai ba ruai iya ke dipadu ka nyadi kepala taun empu.udah
tembu sida ka beranchau nya tadi, dua iku orang lalu belanda ngirit chapan berengkah ari ruai tuai gawai, siku ke setak ili,lalu siku ke setak ulu, mupu ka Antu Rua, niti tempuan. Lebuh mansa mua pintu bilik sida sarumah nya seduai iya lalu bejaku, “Mupu ka Antu Rua aku tu.” Dia orang ke indu lalu meri mayuh macham utai ke enda manah baka gari sepit, gari raga, gari senduk enggau utai bukai. Datai seduai ba pala tangga, seduai lalu ngebu ka semua utai ke bisi dalam chapan kebaruh rumah enggau jaku munyi tu:
“Tu beri kami ngagai nuan Antu Rua, Antu Rangka. Anang agi minta, anang agi nanya. Utai tu bai nuan pulai ke Brunei, ke tasik besai, bai pulai ke Sintang, ke Tawang.”
Udah tembu mupu ka Antu Rua, manuk lalu di biau ka baru kena ngerah ngalu batu. Orang pan lalu nurun siku sapintu, mai pua kumbu kena nyandik tauka ngema batu pulai kerumah.
Ripih sida ke bejalai pulai ngemai batu nya, siku dulu ngenyan setunggul burak, lalu ditangkanka orang siku minching manuk. Udah nya dientudika orang siku minching tabak piring,udah nya baru tuai gawai ke lalu ditangkan orang bukai bejalai betunda udi, dulu ari bala lemambang ke mengap enggau orang ke begendang. Datai di tanah sida lalu bejalai melit langkau panggau nya tiga kali besundang. Indu lalu nabur panggau batu enggau letup. Udah tenbu pengawa nya, baru siku ari sida ke lelaki miau enggau manuk munyi tu:
“Sa, dua, tiga, empat, lima, enam, tujuh! Aku miau batu enggau manuk, kena aku minta taun ka tu enggau ka agi tu ila mansang jurus, mansang alus, enda senika, enda menawa. Aku minta bulih padi, bulih tempuli. Aku minta kami belimpah minta kami betuah bulih reta, bulih pengeraja ari taun ke udah, ngambika kami tau senang, tau lantang.”
Nyadi sepengudah langkau panggau batu dibiau enggau manuk, tuai gawai lalu ngambi batu ai iya dulu, ke lalu dima tauka disandik iya enggau pua. Iya lalu ditangkan ka orang ka bukai niki kerumah lalu niti tempuan. Nyadi semua pintu bilik sekayu rumah nya deka ditelengaka orang magang-magang awak ka Petara tama lalu nganjung tuah. Sida ke bejalai nya besundang tiga kali betiti ka ruai enggau pantar nguluka bala lemambang ke mengap enggau orang ke begendang.
Sekumbang bejalai niti rumah nya sida deka dilanggar sida serumah nya enggau tuak ke dikumbai urang ngelanggar batu tiki. Udah tembu bejalai niti rumah besundang tiga kali, nya baru sida lalu nuduk ka diri ba ruai tuai gawai tauka ba bilik iya nitih ka atur ke dulu. Sereta duduk bala sida nya tadi, orang lalu ngasuh bini tuai gawai nyendiaka ai kena masu batu.
Nyadi utai ka endur masu batu nya, enti agi kelia sida aki ini kitai bekenaka bisin temaga, tang kemaya ari tu bisi bendar (ari tin tauka plastik). Utai ka bisi direndam dia nya baka sida rangki, pelaga, gerunung, tinchin mas enggau ringgit. Nyadi utai ke di kena bekirah ngambika manah bau nya buah kepayang kirai, kerupak buah langgir, tepus bau, bunga tual, bunga buot rangkai begulai enggau darah manuk enggau darah babi ke bisi dibai pulai ari tanah kena ngenselan menua tadi.
Niap genap iku orang ke beempu batu nya tadi lalu sama beambika ai nya magang dikena sida masu batu diri empu. Udah bekau nya,barang sapa bagi orang ke bisi ngembuan pengaruh lalu, bebasu ke pengaruh sida ba ai ke diambi diri empu tadi. Udah tembu nya baru tuai gawai ngayan ka upah orang ke masu batu. Utai ke bisi di ambika upah iya nya baka sida duku sebilah ngambi ka bisi dikena sida ngeringka samengat, tepayan sigi ka dikena ngurung samengat enggau belachu sadepa nyadi ka tudung iya.
Kejang orang deka berengkah masu batu, gendang rayah lalu dipangkung tiga renggat. Sereta gendang bemunyi, siku orang lalu masu batu ngena ai ke diambi orang tadi enggau siku lalu ngeminyak iya. Udah batu diminyak, iya lalu ngengkahka batu nya ba atas dulang tapang, laban kebuah piak batu nya enda tau sabarang alai ngengkah ke iya.
Udah tembu pengawa nya tadi, baru bala sida ke nyadi tuai bilik tauka pengari nyendiaka diri deka ngatur pengawa begulu sekali da agi ngagai ruai tuai gawai bebai ka utai dempa enggau utai irup. Sida pan lalu berengkah sama berami ngirup. Bisi sekeda nya mai tuak enggau arak, bisi mega bebaika ai kopi, ai teh,tak ni utai ke bisi ba bilik diri empu bela dibai magang. Bisi meh bebaika salai, kasam, awak ka semua bala pengabang enggau diri serumah sama bela ampit bepakai ka utai ke bisi.
Udah pengawa begulu tu tadi tembu, bala lemambang belabuh nampung pengap sida iya baru, mulaika semengat padi, semengat batu enggau semengat sida iya empu enggaika udah terunda-runda tepejuh jauh lebuh maya rami gawai nya tadi.
Abis pengawa bala lemambang ke mengap, sida lalu digempuru ka baru ba ruai tuai gawai lalu diberi upah sereta mega enggau mata duit, belachu enggau kebuk enggau besi baka sida duku ambika bisi dikena ngering ka semengat.
Bisi kala nyadi mega, kena orang serumah nya berami baru, bala sida lemambang mega bisi diasuh orang nenjang bala orang ke deka minta denjang. Denjang tu reti iya pengap puji ngagai orang siku-siku. Udah tembu nenjang siku, lalu nenjang siku mega.Niap iku tubuh orang ke minta denjang nya sigi udah nyendiaka pemeri ngagai sapa lemambang ke udah di asuh sida nenjang.
Nyau pulai baru ngagai pengawa orang ka begawai nya tadi, batu ke udah diminyak nya tadi lalu di teju ka bemalam ba panggau dia dulu. Nyau udah pagi siti baru sida ke empu batu nya ngemai batu nya ngagai umai sida iya empu, laban maya tu sigi udah manggul. Batu ke dibai sida iya nya tadi lalu nyadi ka alai sida beransah ka duku dikena sida ngepunka tebas sida iya, lalu di jadika indu batu ba umai.
Kebuah pia, laban ukai semina siti batu pengansah aja ke bisi dibai ngagai pelasar endur sida ngetu tauka palan alai ngetu belelak lebuh nebas. Pelasar nya mega nyadi ka palan alai sida iya ngintu diri makai tauka manduk asi enggau lauk,kelebih agi lebuh maya sida beduruk enggau bebala mayuh.
Tang enti nyema semina diri sebilik aja ke gawa,ketebal agi orang kelia selalu bebaika bekal ari rumah. Asi orang menya selalu ditungkus ka enggau upih, ke bisi nambahka penyamai asi, kelebih agi enti nyema nya asi ari beras padi bukit.
Gawai Batu tu lama udah nadai kala didirika ba menua kitai diatu, laban ketegal ke udah lama masuk pengarap baru,ketebal agi kitai diatu mayuh agi ngena jalai sembiang merekat umai. Taja pan agi bisi dua tiga pintu bilik ke bumai bukit tauka bumai paya, bala enda tentu gagit agi deka ngintu gawai bakanya, ketegal orang ke bepenemu jalai intu pengawa nya pan nyau majak kurang. Ka tambah nya mega bala lemambang ke nemu pengap tu pan nyau udah nadai tentu bisi agi.enti bisi pan nyangka enda ambis jari kitai dilepika di kena ngitung tubuh sida ke amat landik dalam pengawa ke baka tu
Endang sigi baka iya nya,dunya nyau makin moden,singkang kitai pan nyau makin jauh ga,adat lama sigi nadai tentu dikibuh ka bala nembiak kitai bansa Iban ke rebak baru diatu.Ngaku diri Iban pan semina dalam ati aja meh,malu madah ke diri anak Iban.Nyangka sigi udah adat diau ba dunya tu diatur sida petara, semua penemu ke bisi semina ulih di ambi ka simpan baka pesaka lama, tang enti nyema iya dijual nyangka iya berega ari tajau Singa Raja,jauh berega ari semua utai bukai.
Penemu nya tau mega di ambi kitai ka di kena kitai maju nyingkang ke mua nitih ke bansa bukai nuju pemansang dunya kemaya ari tu. Nya alai ngajih ka gayu meh penemu nya , enda iya bebulaka kitai semua, besai meh pemanggai iya ka kitai,anang meh ngelengka ka adat lama kitai, ambi meh nyadi ka penerang enggau ketenggau ati kitai nuju pemansang enggau pemujur.NADAI ADAT LAMA NADAI MEH IBAN.




BESI
 
apaisimba's page belabuh ari august 2008